کیوں مجھ سے نظر پھیری اے مرشد مے خانہ

کیوں مجھ سے نظر پھیری اے مرشد مے خانہ

دریا کے پاس آکر پیاسا رہا مستانہ

پوچھا نہ کبھی تو نے حال دل دیوانہ

شمع تیری محفل میں جلتا رہا پروانہ

برق فلک چمن میں کیوں جھانکتی پھرتی ہے

گلشن میں یا الٰہی کس کا ہے آشیانہ

کچھ آس لے کے دل میں لایا ہوں دل کو اپنے

اے ترچھی نظر والے اک اس طرف نشانہ

سرگرم گفتگو تھے غیروں سے سر محفل

اپنے ہی فدائی کو تو نے نہیں پہچانا

پھر تو نے بلایا ہے محفل میں عاشقوں کو

کیا تیرا ارادہ ہے اے جلوۂ جانانہ

لے کر بہار بستاں آیا ہے دل قفس میں

ویرانے میں آبادی آبادی میں ویرانہ

اک کیف ہے آنکھوں میں کیف میں آنکھیں ہیں

دیوانے میں مستی ہے مستی میں ہے دیوانہ

بے پر کے اڑ رہے ہیں پی پی کے جام عرفاں

ساقی کا مے کدہ بھی نازاںؔ ہے پری خانہ