nikal gae hain KHirad ki hadon se diwane

nikal ga.e haiñ ḳhirad kī hadoñ se dīvāne

ab ahl-e-hosh se kah do na aa.eñ samjhāne

bisāt-e-bazm ulaT kar kahāñ gayā saaqī

fazā ḳhamosh subū chup udaas paimāne

ye kis ke ġham ne diloñ kā qarār luuT liyā

ye kis kī yaad meñ sar phoḌte haiñ dīvāne

bharī bahār kā manzar abhī nigāh meñ thā

mirī nigāh ko kyā ho gayā ḳhudā jaane

hai kaun bar-lab-e-sāhil ki peshvā.ī ko

qadam uThā.e ba-andāz-e-mauj dariyā ne

tamām shahar meñ ik dard-āshnā na milā

basā.e isliye ahl-e-junūñ ne vīrāne

na ab vo jalva-e-yūsuf na misr kā bāzār

na ab vo husn ke tevar na ab vo dīvāne

na harf-e-haq na vo mansūr kī zabāñ na vo daar

na karbalā na vo kaTte saroñ ke nazrāne

na bāyazīd na shiblī na ab junaid koī

na ab vo soz na aaheñ na hā-o-hū-kHāne

ḳhayāl-o-ḳhvāb kī sūrat bikhar gayā maazī

na silsile na vo qisse na ab vo afsāne

na qadr-dāñ na koī ham-zabāñ na insāñdost

fazā-e-shahr se behtar haiñ ab to vīrāne

badal ga.e haiñ taqāze mizāj vaqt ke saath

na vo sharāb na saaqī na ab vo mai-ḳhāne

tamām band junūñ toḌ bhī gayā lekin

anā ke jaal meñ jakḌe hue haiñ farzāne

ye inqalāb kahāñ āsmāñ ne dekhā thā

ulajh rahe haiñ ġham-e-zindagī se dīvāne

har ek apne hī sūd-o-ziyāñ kī fikr meñ hai

koī to ho jo mire dil kā dard pahchāne

tirā vujūd ġhanīmat hai phir bhī ai saaqī

ki ho ga.e haiñ phir ābād aaj mai-ḳhāne

vahī hujūm vahī raunaqeñ vahī mai-kash

vahī nasha vahī mastī vahī tarab-ḳhāne

jabīñ ko dar pe tire rakh diyā yahī kah kar

ye jaane aur tirā sañg-e-āstāñ jaane

uTheñge pī ke tirī mai-navāz āñkhoñ se

ye tai kiye hue baiThe haiñ aaj dīvāne

hai terī zaat vo ik sham-e'-anjuman-afroz

ki jis kī lau pe lapakte raheñge parvāne

koī nishāt kā sāmāñ koī tarab kī sabīl

lagī hai phir sar-e-mai-ḳhāna badliyāñ chhāne

tū boltā hai to chaltī hai nabz-e-mai-kHāna

tū dekhtā hai to karte haiñ raqs parvāne

ye mastiyāñ nahīñ jām-o-subū ke hisse meñ

terī nigāh se patte haiñ tere dīvāne

'nasīr' ashk to palkoñ pe sab ne dekh liye

guzar rahī hai jo dil par vo koī kyā jaane

nikal gae hain KHirad ki hadon se diwane

ab ahl-e-hosh se kah do na aaen samjhane

bisat-e-bazm ulaT kar kahan gaya saqi

faza KHamosh subu chup udas paimane

ye kis ke gham ne dilon ka qarar luT liya

ye kis ki yaad mein sar phoDte hain diwane

bhari bahaar ka manzar abhi nigah mein tha

meri nigah ko kya ho gaya KHuda jaane

hai kaun bar-lab-e-sahil ki peshwai ko

qadam uThae ba-andaz-e-mauj dariya ne

tamam shahar mein ek dard-ashna na mila

basae isliye ahl-e-junun ne virane

na ab wo jalwa-e-yusuf na misr ka bazar

na ab wo husn ke tewar na ab wo diwane

na harf-e-haq na wo mansur ki zaban na wo dar

na karbala na wo kaTte saron ke nazrane

na bayazid na shibli na ab junaid koi

na ab wo soz na aahen na ha-o-hu-kHane

KHayal-o-KHwab ki surat bikhar gaya mazi

na silsile na wo qisse na ab wo afsane

na qadr-dan na koi ham-zaban na insandost

faza-e-shahr se behtar hain ab to virane

badal gae hain taqaze mizaj waqt ke sath

na wo sharab na saqi na ab wo mai-KHane

tamam band junun toD bhi gaya lekin

ana ke jal mein jakDe hue hain farzane

ye inqalab kahan aasman ne dekha tha

ulajh rahe hain gham-e-zindagi se diwane

har ek apne hi sud-o-ziyan ki fikr mein hai

koi to ho jo mere dil ka dard pahchane

tera wujud ghanimat hai phir bhi ai saqi

ki ho gae hain phir aabaad aaj mai-KHane

wahi hujum wahi raunaqen wahi mai-kash

wahi nasha wahi masti wahi tarab-KHane

jabin ko dar pe tere rakh diya yahi kah kar

ye jaane aur tera sang-e-astan jaane

uThenge pi ke teri mai-nawaz aankhon se

ye tai kiye hue baiThe hain aaj diwane

hai teri zat wo ek sham-e'-anjuman-afroz

ki jis ki lau pe lapakte rahenge parwane

koi nishat ka saman koi tarab ki sabil

lagi hai phir sar-e-mai-KHana badliyan chhane

tu bolta hai to chalti hai nabz-e-mai-kHana

tu dekhta hai to karte hain raqs parwane

ye mastiyan nahin jam-o-subu ke hisse mein

teri nigah se patte hain tere diwane

'nasir' ashk to palkon pe sab ne dekh liye

guzar rahi hai jo dil par wo koi kya jaane