nishan is ka kisi se kab bayan ho

nishāñ is kā kisī se kab bayāñ ho

vahī paave nishāñ jo be-nishāñ ho

munazzah vo to he kaun-o-makāñ se

makāñ us ko kahāñ jo lā-makāñ ho

koī jāgah nahīñ par us se ḳhālī

zamīn ho arsh ho yā āsmāñ ho

sivā us ke nahīñ koī jahāñ meñ

talāsh us kī kaaro yaaro jahāñ ho

'turāb' ustād se ma.alūm kar lo

tarīq-e-ma.arifat gar qadr-dāñ ho

ġhanīmat hai mulāqāt aaj us kī

ḳhudā-ma.alūm phir kab ho kahāñ ho

nishan is ka kisi se kab bayan ho

wahi pawe nishan jo be-nishan ho

munazzah wo to he kaun-o-makan se

makan us ko kahan jo la-makan ho

koi jagah nahin par us se KHali

zamin ho arsh ho ya aasman ho

siwa us ke nahin koi jahan mein

talash us ki karo yaro jahan ho

'turab' ustad se malum kar lo

tariq-e-marifat gar qadr-dan ho

ghanimat hai mulaqat aaj us ki

KHuda-malum phir kab ho kahan ho