dil chhin liya mera naz se tu ek aan mein aankhen mila ke sajan

dil chhīn liyā mirā naaz se tū ik aan meñ āñkheñ milā ke sajan

be-dil meñ taḌaptā huuñ rotā sadā haaye āñkhoñ se aañsū bahā ke sajan

maiñ to aage hī kushta huuñ shoḳh-e-nigāh ab na kar itne jaur-o-jafā

tū ne ḳhuun kiyā ba-ḳhudā mirā haaye hāthoñ pe mehñdī lagā ke sajan

mire nāloñ meñ koī asar hī nahīñ mirā thamtā to dard-e-jigar hī nahīñ

mujhe aatā kahīñ to nazar hī nahīñ haaye zulf kā naag Dasā ke sajan

mujhe jiine kā koī mazā hī nahīñ mujhe chain to aatā zarā hī nahīñ

mire haal kā tujh ko pata hī nahīñ haaye maarā hai tū ne rulā ke sajan

ai jān-e-jahāñ tū ne dhokā kiyā is baat kā mujh ko nahīñ thā patā

haaye mujh ko sarāpā jalā hī diyā tū ne 'ishq kī aag lagā ke sajan

kal mahfil-e-ġhair meñ tum jo ga.e aur ’aish se shab-bhar vaañ hī rahe

sub.h aa.e to maiñ ne bhī dekh liyā jab guzre the mukhḌā chhupā ke sajan

tere dar pe baiThā huuñ dhūnī lagā vo kaun hai mujh ko jo degā uThā

mujhe dhamkī de kar mat tū Darā mar jā.ūñgā sar paTkā ke sajan

ghūñghaT ko uThā ab bahr-e-ḳhudā zarā husn-e-ḳhūbāñ mujh ko dikhā

kar vasl kā va.ada ab to vafā ye 'niyāz' gale se lagā ke sajan

dil chhin liya mera naz se tu ek aan mein aankhen mila ke sajan

be-dil mein taDapta hun rota sada haye aankhon se aansu baha ke sajan

main to aage hi kushta hun shoKH-e-nigah ab na kar itne jaur-o-jafa

tu ne KHun kiya ba-KHuda mera haye hathon pe mehndi laga ke sajan

mere nalon mein koi asar hi nahin mera thamta to dard-e-jigar hi nahin

mujhe aata kahin to nazar hi nahin haye zulf ka nag Dasa ke sajan

mujhe jine ka koi maza hi nahin mujhe chain to aata zara hi nahin

mere haal ka tujh ko pata hi nahin haye mara hai tu ne rula ke sajan

ai jaan-e-jahan tu ne dhoka kiya is baat ka mujh ko nahin tha pata

haye mujh ko sarapa jala hi diya tu ne 'ishq ki aag laga ke sajan

kal mahfil-e-ghair mein tum jo gae aur ’aish se shab-bhar wan hi rahe

subh aae to main ne bhi dekh liya jab guzre the mukhDa chhupa ke sajan

tere dar pe baiTha hun dhuni laga wo kaun hai mujh ko jo dega uTha

mujhe dhamki de kar mat tu Dara mar jaunga sar paTka ke sajan

ghunghaT ko uTha ab bahr-e-KHuda zara husn-e-KHuban mujh ko dikha

kar wasl ka wada ab to wafa ye 'niyaz' gale se laga ke sajan