دل چھین لیا مرا ناز سے تو اک آن میں آنکھیں ملا کے سجن

دل چھین لیا مرا ناز سے تو اک آن میں آنکھیں ملا کے سجن

بیدل میں تڑپتا ہوں روتا سدا ہائے آنکھوں سے آنسو بہا کے سجن

میں تو آگے ہی کشتہ ہوں شوخ نگاہ اب نہ کر اتنے جور و جفا

تو نے خون کیا بخدا مرا ہائے ہاتھوں پہ مہندی لگا کے سجن

مرے نالوں میں کوئی اثر ہی نہیں مرا تھمتا تو درد جگر ہی نہیں

مجھے آتا کہیں تو نظر ہی نہیں ہائے زلف کا ناگ ڈسا کے سجن

مجھے جینے کا کوئی مزا ہی نہیں مجھے چین تو آتا ذرا ہی نہیں

مرے حال کا تجھ کو پتہ ہی نہیں ہائے مارا ہے تو نے رلا کے سجن

اے جان جہاں تو نے دھوکا کیا اس بات کا مجھ کو نہیں تھا پتا

ہائے مجھ کو سراپا جلا ہی دیا تو نے عشق کی آگ لگا کے سجن

کل محفل غیر میں تم جو گئے اور عیش سے شب بھر واں ہی کہیں

صبح آئے تو میں نے بھی دیکھ لیا جب گزرے تھے مکھڑا چھپا کے سجن

تیرے در پہ بیٹھا ہوں دھونی لگا وہ کون ہے مجھ کو جو دے گا اٹھا

مجھے دھمکی دے کر مت تو ڈرا مر جاؤں گا سر پٹکا کے سجن

گھونگھٹ کو اٹھا اب بہر خدا ذرا حسن خوباں مجھ کو دکھا

کر وصل کا وعدہ اب تو وفا یہ نیازؔ گلے سے لگا کے سجن