ishq ne sarapa jala hi diya hai

'ishq ne sarāpā jalā hī diyā hai

dikhānā thā jo vo dikhā hī diyā hai

nahīñ hosh apnā bajā ab to yaaro

mujhe mast-e-be-ḳhud banā hī diyā hai

maiñ soyā paḌā thā jo ḳhvāb-e-'adam meñ

lagā kar ke Thokar jagā hī diyā hai

kahīñ nahnu-’aqrab kā va.ada hai karatā

kahīñ lā-makāñ huuñ sunā hī diyā hai

kahīñ husn-e-yūsuf meñ jalva dikhāyā

zuleḳhā ko shaidā banā hī diyā hai

kahīñ ho ke muusā kahe rabbe-arenī

kahīñ lan-tarānī sunā hī diyā hai

kahīñ be-ḳhudī meñ anal-haq pukāre

jo mansūr suulī chaḌhā hī diyā hai

kahīñ kunto-kanzan hai detā gavāhī

jo ahad se ahmad banā hī diyā hai

kahīñ sūrat-e-ādam meñ jalva hai detā

malā.ik ne sar ko jhukā hī diyā hai

kiyā hai jo inkār shaitān-e-la.īñ ne

to mal.ūn us ko banā hī diyā hai

likhā kar to mazmūn-e-shīrīñ 'niyāz' ab

jo shā.ir tujhe haq banā hī diyā hai

'ishq ne sarapa jala hi diya hai

dikhana tha jo wo dikha hi diya hai

nahin hosh apna baja ab to yaro

mujhe mast-e-be-KHud bana hi diya hai

main soya paDa tha jo KHwab-e-'adam mein

laga kar ke Thokar jaga hi diya hai

kahin nahnu-’aqrab ka wada hai karata

kahin la-makan hun suna hi diya hai

kahin husn-e-yusuf mein jalwa dikhaya

zuleKHa ko shaida bana hi diya hai

kahin ho ke musa kahe rabbe-areni

kahin lan-tarani suna hi diya hai

kahin be-KHudi mein anal-haq pukare

jo mansur suli chaDha hi diya hai

kahin kunto-kanzan hai deta gawahi

jo ahad se ahmad bana hi diya hai

kahin surat-e-adam mein jalwa hai deta

malaik ne sar ko jhuka hi diya hai

kiya hai jo inkar shaitan-e-lain ne

to malun us ko bana hi diya hai

likha kar to mazmun-e-shirin 'niyaz' ab

jo shair tujhe haq bana hi diya hai