jam-e-mai-e-wahdat pilaya yar ne

jām-e-mai-e-vahdat pilāyā yaar ne

mujh ko mastāna banāyā yaar ne

piite hī majnūñ maiñ to ho gayā

dar-badar mujh ko phirāyā yaar ne

miT gayā nām-o-nishāñ merā sabhī

raḳht-e-hastī kā jalāyā yaar ne

phir 'ajab mujh ko diyā shān-e-'urūj

banda se maulā banāyā yaar ne

mā-sivā-e-haq nahīñ maujūd-e-ġhair

kyā 'ajab nukta batāyā yaar ne

bol uThā mansūr anal-haq josh meñ

daar par us ko chaḌhāyā yaar ne

aap hī mulla-o-muftī maulvī

aap hī jāhil kahāyā yaar ne

aap mutrib aap sāz-o-āp raag

aap hī gaayā bajāyā yaar ne

ai 'niyāz' ab to nahīñ likhtā ġhazal

qalam-e-dast-e-kHud chalāyā yaar ne

jam-e-mai-e-wahdat pilaya yar ne

mujh ko mastana banaya yar ne

pite hi majnun main to ho gaya

dar-badar mujh ko phiraya yar ne

miT gaya nam-o-nishan mera sabhi

raKHt-e-hasti ka jalaya yar ne

phir 'ajab mujh ko diya shan-e-'uruj

banda se maula banaya yar ne

ma-siwa-e-haq nahin maujud-e-ghair

kya 'ajab nukta bataya yar ne

bol uTha mansur anal-haq josh mein

dar par us ko chaDhaya yar ne

aap hi mulla-o-mufti maulwi

aap hi jahil kahaya yar ne

aap mutrib aap saz-o-ap rag

aap hi gaya bajaya yar ne

ai 'niyaz' ab to nahin likhta ghazal

qalam-e-dast-e-kHud chalaya yar ne