nukta-chin hai gham-e-dil usko sunae na bane

nukta-chīñ hai ġham-e-dil us ko sunā.e na bane

kyā bane baat jahāñ baat banā.e na bane

maiñ bulātā to huuñ us ko magar ai jazba-e-dil

us pe ban jaa.e kuchh aisī ki bin aa.e na bane

khel samjhā hai kahīñ chhoḌ na de bhuul na jaa.e

kaash yuuñ bhī ho ki bin mere satā.e na bane

ġhair phirtā hai liye yuuñ tire ḳhat ko ki agar

koī pūchhe ki ye kyā hai to chhupā.e na bane

is nazākat kā burā ho vo bhale haiñ to kyā

haath aaveñ to unheñ haath lagā.e na bane

kah sake kaun ki ye jalva-garī kis kī hai

parda chhoḌā hai vo us ne ki uThā.e na bane

maut kī raah na dekhūñ ki bin aa.e na rahe

tum ko chāhūñ ki na aao to bulā.e na bane

bojh vo sar se girā hai ki uThā.e na uThe

kaam vo aan paḌā hai ki banā.e na bane

'ishq par zor nahīñ hai ye vo ātish 'ġhālib'

ki lagā.e na lage aur bujhā.e na bane

nukta-chin hai gham-e-dil us ko sunae na bane

kya bane baat jahan baat banae na bane

main bulata to hun us ko magar ai jazba-e-dil

us pe ban jae kuchh aisi ki bin aae na bane

khel samjha hai kahin chhoD na de bhul na jae

kash yun bhi ho ki bin mere satae na bane

ghair phirta hai liye yun tere KHat ko ki agar

koi puchhe ki ye kya hai to chhupae na bane

is nazakat ka bura ho wo bhale hain to kya

hath aawen to unhen hath lagae na bane

kah sake kaun ki ye jalwa-gari kis ki hai

parda chhoDa hai wo us ne ki uThae na bane

maut ki rah na dekhun ki bin aae na rahe

tum ko chahun ki na aao to bulae na bane

bojh wo sar se gira hai ki uThae na uThe

kaam wo aan paDa hai ki banae na bane

'ishq par zor nahin hai ye wo aatish 'ghaalib'

ki lagae na lage aur bujhae na bane