uThe na the abhi hum haal-e-dil sunane ko

uThe na the abhī ham hāl-e-dil sunāne ko

zamāne baiTh gayā hāshiye chaḌhāne ko

bharī bahār meñ pahuñchī ḳhizāñ miTāne ko

qadam uThā.e jo kaliyoñ ne muskurāne ko

jalāyā ātish-e-gul ne chaman meñ har tinkā

bahār phūñk ga.ī mere āshiyāne ko

jamāl-e-bāda-o-sāġhar meñ haiñ rumūz bahut

mirī nigāh se dekho sharāb-ḳhāne ko

qadam qadam pe rulāyā hameñ muqaddar ne

ham un ke shahar meñ aa.e the muskurāne ko

na jaane ab vo mujhe kyā javāb dete haiñ

sunā to dī hai unheñ dāstāñ sunāne ko

kaho ki ham se raheñ duur hazrat-e-vā’iz

baḌe kahīñ ke ye aa.e sabaq paḌhāne ko

ab ek jashn-e-qiyāmat hī aur baaqī hai

adāoñ se to vo bahlā chuke zamāne ko

shab-e-firāq na tum aa sake na maut aa.ī

ġhamoñ ne gher liyā thā ġharīb-ḳhāne ko

'nasīr' jin se tavaqqo' thī saath dene kī

tule haiñ mujh pe vahī uñgliyāñ uThāne ko

uThe na the abhi hum haal-e-dil sunane ko

zamane baiTh gaya hashiye chaDhane ko

bhari bahaar mein pahunchi KHizan miTane ko

qadam uThae jo kaliyon ne muskurane ko

jalaya aatish-e-gul ne chaman mein har tinka

bahaar phunk gai mere aashiyane ko

jamal-e-baada-o-saghar mein hain rumuz bahut

meri nigah se dekho sharab-KHane ko

qadam qadam pe rulaya hamein muqaddar ne

hum un ke shahar mein aae the muskurane ko

na jaane ab wo mujhe kya jawab dete hain

suna to di hai unhen dastan sunane ko

kaho ki hum se rahen dur hazrat-e-wa’iz

baDe kahin ke ye aae sabaq paDhane ko

ab ek jashn-e-qiyamat hi aur baqi hai

adaon se to wo bahla chuke zamane ko

shab-e-firaq na tum aa sake na maut aai

ghamon ne gher liya tha gharib-KHane ko

'nasir' jin se tawaqqo' thi sath dene ki

tule hain mujh pe wahi ungliyan uThane ko