is shan se wo husn-e-sarapa nazar aaya

is shaan se vo husn-e-sarāpā nazar aayā

saaya bhī mujhe nuur kā putlā nazar aayā

juz maiñ bhī mujhe kal kā tamāshā nazar aayā

qatra liye āġhosh meñ dariyā nazar aayā

gulshan meñ bhī terī hī tajallī nazar aa.ī

sahrā meñ bhī terā hī tamāshā nazar aayā

kyā kyā nazar aayā hai ye na pūchho mire dil se

āñkheñ nahīñ kah saktī haiñ kyā kyā nazar aayā

aafat thī qiyāmat thī tirī shoḳh-nigāhī

jazbāt kā 'ālam tah-o-bālā nazar aayā

har vahm ba-juz asal na thā be-ḳhabarī meñ

jab raaz khulā asl bhī dhokā nazar aayā

ek qatra-e-nā-chīz thā jo ḳhūn-e-jigar meñ

āñkhoñ se umañDtā huā dariyā nazar aayā

har jalve meñ dekhā tire jalve kā hī partav

har husn tire husn kā charba nazar aayā

jo kuchh nazar aayā nazar aayā hī vo samjho

maiñ kah nahīñ saktā ki mujhe kyā nazar aayā

mehr-o-mah-o-anjum to haiñ mehr-o-mah-o-anjum

zarra bhī mujhe nuur kī duniyā nazar aayā

allāh re us bazm meñ hairat kā ye 'ālam

parde ke na hone pe bhī pardā nazar aayā

duniyā ke nazāre tere jalve pe tasadduq

sab kuchh nazar aayā mujhe tū kyā nazar aayā

vo husn-e-fusūñ kār-e-’ajab sho.abda-gar hai

har ruup meñ ik ruup nirālā nazar aayā

sau ḳhaar mere dīda-e-pur-shauq meñ khaTke

jab jā ke kahīñ ik gul-e-rā'anā nazar aayā

ai 'qais' batā de mujhe kyā un ko batā.ūñ

jo pūchhte haiñ mujh se tujhe kyā nazar aayā

is shan se wo husn-e-sarapa nazar aaya

saya bhi mujhe nur ka putla nazar aaya

juz main bhi mujhe kal ka tamasha nazar aaya

qatra liye aaghosh mein dariya nazar aaya

gulshan mein bhi teri hi tajalli nazar aai

sahra mein bhi tera hi tamasha nazar aaya

kya kya nazar aaya hai ye na puchho mere dil se

aankhen nahin kah sakti hain kya kya nazar aaya

aafat thi qiyamat thi teri shoKH-nigahi

jazbaat ka 'alam tah-o-baala nazar aaya

har wahm ba-juz asal na tha be-KHabari mein

jab raaz khula asl bhi dhoka nazar aaya

ek qatra-e-na-chiz tha jo KHun-e-jigar mein

aankhon se umanDta hua dariya nazar aaya

har jalwe mein dekha tere jalwe ka hi partaw

har husn tere husn ka charba nazar aaya

jo kuchh nazar aaya nazar aaya hi wo samjho

main kah nahin sakta ki mujhe kya nazar aaya

mehr-o-mah-o-anjum to hain mehr-o-mah-o-anjum

zarra bhi mujhe nur ki duniya nazar aaya

allah re us bazm mein hairat ka ye 'alam

parde ke na hone pe bhi parda nazar aaya

duniya ke nazare tere jalwe pe tasadduq

sab kuchh nazar aaya mujhe tu kya nazar aaya

wo husn-e-fusun kar-e-’ajab shoabda-gar hai

har rup mein ek rup nirala nazar aaya

sau KHar mere dida-e-pur-shauq mein khaTke

jab ja ke kahin ek gul-e-ra'ana nazar aaya

ai 'qais' bata de mujhe kya un ko bataun

jo puchhte hain mujh se tujhe kya nazar aaya