yahi muKHtasar ishq ki dastan hai

yahī muḳhtasar 'ishq kī dāstāñ hai

jo hai baat ham meñ vo tum meñ kahāñ hai

sar-e-husn chaukhaT pe merī jhukā hai

ye zinda mere 'ishq kā mo’jiza hai

merā 'ishq gar kār-farmā na hotā

tere husn kā 'aam charchā na hotā

abhī tum ne duniyā meñ dekhā hī kyā hai

mere 'ishq ko tum ne samjhā hī kyā hai

milī 'ishq ko is tarh sarfarāzī

ki dil haar kar jiit lī dil kī baazī

sahārā agar 'ishq-e-yūsuf na detā

na jaane zuleḳhā kā kyā haal hotā

mere dard meñ dard-e-duniyā nihāñ hai

jo hai baat ham meñ vo tum meñ kahāñ hai

kahīñ qalb-e-lailā meñ majnūñ basā hai

kahīñ 'ishq-e-shīrīñ ko farhād kā hai

kahīñ nām-e-vāmiq pe 'azrā miTī hai

kahīñ dām-e-punnuñ meñ sassī phañsī hai

kahīñ 'ishq suunī ko mahivāl kā hai

kahīñ hiir rāñjhā pe dil se fidā hai

javāñ thā merā 'ishq ab bhī javāñ hai

jo hai baat ham meñ vo tum meñ kahāñ hai

merā 'ishq ġhāfil ko farzāna kar de

terā husn 'āqil ko dīvāna kar de

ye maanā ki tū ḳhūb-rū hai javāñ hai

magar e'tibār-e-javānī kahāñ hai

javānī ko ek roz khonā paḌegā

tumheñ ḳhūn-e-māzī pe ronā paḌegā

zamāna bhī 'qaisar' merā ham-zabāñ hai

jo hai baat ham meñ vo tum meñ kahāñ hai

yahi muKHtasar 'ishq ki dastan hai

jo hai baat hum mein wo tum mein kahan hai

sar-e-husn chaukhaT pe meri jhuka hai

ye zinda mere 'ishq ka mo’jiza hai

mera 'ishq gar kar-farma na hota

tere husn ka 'am charcha na hota

abhi tum ne duniya mein dekha hi kya hai

mere 'ishq ko tum ne samjha hi kya hai

mili 'ishq ko is tarh sarfaraazi

ki dil haar kar jit li dil ki bazi

sahaara agar 'ishq-e-yusuf na deta

na jaane zuleKHa ka kya haal hota

mere dard mein dard-e-duniya nihan hai

jo hai baat hum mein wo tum mein kahan hai

kahin qalb-e-laila mein majnun basa hai

kahin 'ishq-e-shirin ko farhad ka hai

kahin nam-e-wamiq pe 'azra miTi hai

kahin dam-e-punnun mein sassi phansi hai

kahin 'ishq suni ko mahiwal ka hai

kahin hir ranjha pe dil se fida hai

jawan tha mera 'ishq ab bhi jawan hai

jo hai baat hum mein wo tum mein kahan hai

mera 'ishq ghafil ko farzana kar de

tera husn 'aqil ko diwana kar de

ye mana ki tu KHub-ru hai jawan hai

magar e'tibar-e-jawani kahan hai

jawani ko ek roz khona paDega

tumhein KHun-e-mazi pe rona paDega

zamana bhi 'qaisar' mera ham-zaban hai

jo hai baat hum mein wo tum mein kahan hai