ishq ki badaulat hi dil se dil ko rahat hai

'ishq kī badaulat hī dil se dil ko rāhat hai

kyā kareñ shikāyat ham tum se jab mohabbat hai

dil-navāz ban jaao yā na.e sitam toḌo

paikar-e-jafā ban kar dāman-e-vafā chhoḌo

ġham ho yā ḳhushī jo bhī baḳhsh do 'ināyat hai

kyā kareñ shikāyat ham tum se jab mohabbat hai

zindagī kā ye tūfān kab rukā kināroñ par

ham ne itnā samjhā hai aap ke ishāroñ par

jaan apnī de denā ye hamārī fitrat hai

kyā kareñ shikāyat ham tum se jab mohabbat hai

jaan kyā hai ham tum par zindagī luTā deñge

miT ke rāh-e-ulfat meñ aap ko du'ā deñge

'ishq kā taqāza hai aur apnī 'ādat hai

kyā kareñ shikāyat ham tum se jab mohabbat hai

ek nazar meñ hotā hai dil se dil meñ ghar paidā

āh-e-be-asar meñ bhī hotā hai asar paidā

'qaisar' ratnāgīrvī husn kī parastish bhī vāqa.'ī 'ibādat hai

kyā kareñ shikāyat ham tum se jab mohabbat hai

'ishq ki badaulat hi dil se dil ko rahat hai

kya karen shikayat hum tum se jab mohabbat hai

dil-nawaz ban jao ya nae sitam toDo

paikar-e-jafa ban kar daman-e-wafa chhoDo

gham ho ya KHushi jo bhi baKHsh do 'inayat hai

kya karen shikayat hum tum se jab mohabbat hai

zindagi ka ye tufan kab ruka kinaron par

hum ne itna samjha hai aap ke ishaaron par

jaan apni de dena ye hamari fitrat hai

kya karen shikayat hum tum se jab mohabbat hai

jaan kya hai hum tum par zindagi luTa denge

miT ke rah-e-ulfat mein aap ko du'a denge

'ishq ka taqaza hai aur apni 'adat hai

kya karen shikayat hum tum se jab mohabbat hai

ek nazar mein hota hai dil se dil mein ghar paida

aah-e-be-asar mein bhi hota hai asar paida

'qaisar' ratnagirwi husn ki parastish bhi waqa'i 'ibaadat hai

kya karen shikayat hum tum se jab mohabbat hai