zindagi ek kirae ka ghar hai ek na ek din badalna paDega

zindagī ek kirā.e kā ghar hai ik na ik din badalnā paḌegā

maut jab tujh ko āvāz degī ghar se bāhar nikalnā paḌegā

ruuTh jā.egī jab tujh se ḳhushiyāñ ġham ke sāñche meñ Dhālnā paḌegā

vaqt aisā bhī aa.egā nādāñ tujh ko kāñToñ pe chalnā paḌegā

itnā mā'zūr ho jā.egā tū itnā majbūr ho jā.egā tū

ye jo maḳhmal kā cholā hai terā ye kafan meñ badalnā paḌegā

kar ke īmāñ se dil kī safā.ī chhoḌ de chhoḌ de tū burā.ī

vaqt baaqī hai ab bhī sambhal jā varna dozaḳh meñ jalnā paḌegā

aisī ho jā.egī terī hālat kaam aa.egī na daulat na tāqat

chhoḌ kar hālat ūñchī havelī tujh ko bāhar nikalnā paḌegā

jalva-e-husn bhī jā-bajā hai aur ḳhatrāt bhī hai ziyāda

zindagānī kā ye rāsta hai har qadam par sambhalnā paḌegā

baap beTe ye bhaa.ī bhatīje tere sāthī haiñ sab jiite jī ke

apne āñgan se uThnā paḌegā apne chaukhaT se Talnā paḌegā

hai bahut hī barī chiiz duniyā kyuuñ samajhtā hai duniyā ko apnā

baaz aa jā gunāhoñ se varna 'umr-bhar haath malnā paḌegā

pyaar se sab ko apnā banā ke jis qadar ho sake tū du'ā ke

mat lagā aag nafrat kī nādāñ varna tujh ko bhī jalnā paḌegā

baal se bhī hai bārīk rasta aur talvār se tez-tar hai

us pe gaThrī gunāhoñ kī ke kar hashr meñ tujh ko chalnā paḌegā

ġham ke māroñ kī hālat pe nādāñ hañs rahā hai magar yaad rakhnā

ashk ban-ban ke āñkhoñ se apnī ek din tujh ko Dhalnā paḌegā

qabr meñ jis ghaḌī jā.egā tū nekiyāñ kaam ā.eñgī tiire

baaz aa jā gunāhoñ se varna hashr tak haath malnā paḌegā

chāhtā hai agar surḳh-rūī chāhtā hai agar nek-nāmī

ye adā chhoḌnī hogī tujh ko is chalan ko badalnā paḌegā

hai agar tujh ko insān banñā to ye 'qaisar' merī baat sun ke

chhoḌnī hogī har ik burā.ī ḳhvāhishoñ ko kuchalnā paḌegā

zindagi ek kirae ka ghar hai ek na ek din badalna paDega

maut jab tujh ko aawaz degi ghar se bahar nikalna paDega

ruTh jaegi jab tujh se KHushiyan gham ke sanche mein Dhaalna paDega

waqt aisa bhi aaega nadan tujh ko kanTon pe chalna paDega

itna ma'zur ho jaega tu itna majbur ho jaega tu

ye jo maKHmal ka chola hai tera ye kafan mein badalna paDega

kar ke iman se dil ki safai chhoD de chhoD de tu burai

waqt baqi hai ab bhi sambhal ja warna dozaKH mein jalna paDega

aisi ho jaegi teri haalat kaam aaegi na daulat na taqat

chhoD kar haalat unchi haweli tujh ko bahar nikalna paDega

jalwa-e-husn bhi ja-baja hai aur KHatraat bhi hai ziyaada

zindagani ka ye rasta hai har qadam par sambhalna paDega

bap beTe ye bhai bhatije tere sathi hain sab jite ji ke

apne aangan se uThna paDega apne chaukhaT se Talna paDega

hai bahut hi bari chiz duniya kyun samajhta hai duniya ko apna

baz aa ja gunahon se warna 'umr-bhar hath malna paDega

pyar se sab ko apna bana ke jis qadar ho sake tu du'a ke

mat laga aag nafrat ki nadan warna tujh ko bhi jalna paDega

baal se bhi hai barik rasta aur talwar se tez-tar hai

us pe gaThri gunahon ki ke kar hashr mein tujh ko chalna paDega

gham ke maron ki haalat pe nadan hans raha hai magar yaad rakhna

ashk ban-ban ke aankhon se apni ek din tujh ko Dhalna paDega

qabr mein jis ghaDi jaega tu nekiyan kaam aaengi tere

baz aa ja gunahon se warna hashr tak hath malna paDega

chahta hai agar surKH-rui chahta hai agar nek-nami

ye ada chhoDni hogi tujh ko is chalan ko badalna paDega

hai agar tujh ko insan banna to ye 'qaisar' meri baat sun ke

chhoDni hogi har ek burai KHwahishon ko kuchalna paDega