us tere sar ki qasam farq sar-e-mu bhi nahin

us tere sar kī qasam farq sar-e-mū bhī nahīñ

jis qadar ham haiñ pareshāñ tire gesū bhī nahīñ

maut ne kitnā kaj-aḳhlāq banāyā hai mujhe

log rote haiñ mirī aañkh meñ aañsū bhī nahīñ

rāt-bhar jalnā hai aa jā idhar ai parvāne

qābil-e-rahm yahāñ maiñ bhī nahīñ tū bhī nahīñ

ab to dāman pe lahū hai kaho kyā kahte ho

ab to inkār-e-sitam kā koī pahlū bhī nahīñ

jā tujhe ham ne bas ai 'umr-e-ravāñ dekh liyā

ham tujhe apnā samajhte the magar tū bhī nahīñ

merī mayyat pe ye iz.hār-e-alam rahne de

rone vaale tirī āñkhoñ meñ to aañsū bhī nahīñ

dil-e-māyūs meñ ehsās-e-ḳhudī tak na rahā

aisā murjhā gayā ye phuul ki ḳhushbū bhī nahīñ

sochtā huuñ ye ki duniyā meñ añdherā kyuuñ hai

tere chehre pe to bikhre hue gesū bhī nahīñ

kitnā hamdard hai hamdardī-e-rahbar dekho

kārvāñ luT gayā aur aañkh meñ aañsū bhī nahīñ

ai 'qamar' shab ke añdhere meñ lahad hai merī

sham’-e-turbat to baḌī chiiz hai jugnū bhī nahīñ

us tere sar ki qasam farq sar-e-mu bhi nahin

jis qadar hum hain pareshan tere gesu bhi nahin

maut ne kitna kaj-aKHlaq banaya hai mujhe

log rote hain meri aankh mein aansu bhi nahin

raat-bhar jalna hai aa ja idhar ai parwane

qabil-e-rahm yahan main bhi nahin tu bhi nahin

ab to daman pe lahu hai kaho kya kahte ho

ab to inkar-e-sitam ka koi pahlu bhi nahin

ja tujhe hum ne bas ai 'umr-e-rawan dekh liya

hum tujhe apna samajhte the magar tu bhi nahin

meri mayyat pe ye izhaar-e-alam rahne de

rone wale teri aankhon mein to aansu bhi nahin

dil-e-mayus mein ehsas-e-KHudi tak na raha

aisa murjha gaya ye phul ki KHushbu bhi nahin

sochta hun ye ki duniya mein andhera kyun hai

tere chehre pe to bikhre hue gesu bhi nahin

kitna hamdard hai hamdardi-e-rahbar dekho

karwan luT gaya aur aankh mein aansu bhi nahin

ai 'qamar' shab ke andhere mein lahad hai meri

sham’-e-turbat to baDi chiz hai jugnu bhi nahin