gate hue peDon ki KHunuk chhanw se aage nikal gae

gaate hue peḌoñ kī ḳhunuk chhāñv se aage nikal ga.e

ham dhuup meñ jalne ko tire gaañv se aage nikal ga.e

aisā bhī to mumkin hai mile be-talab ik muzhda-e-manzil

ham apnī du'āon se tamannāoñ se aage nikal ga.e

kahte haiñ ki jismoñ ko ik rūh-e-muqaddas kī du'ā hai

vo jism ki jo apne thake paañv se aage nikal ga.e

thoḌā sā bhī jin logoñ ko ’irfān-e-mazāhib thā vo bach kar

ka.aboñ se shivāloñ se kalīsāoñ se aage nikal ga.e

the ham bhī gunahgār par ik zāhid-e-makkār kī zid

bāzār meñ biktī huī salmāoñ se aage nikal ga.e

shahroñ ke makīnoñ se milī jab hameñ vahshat kī zamānat

ham sī ke garebānoñ ko sahrāoñ se aage nikal ga.e

bantī rahī ik duniyā 'qatīl' apnī ḳharīdār magar ham

yūsuf na bane aur zuleḳhāoñ se aage nikal ga.e

gate hue peDon ki KHunuk chhanw se aage nikal gae

hum dhup mein jalne ko tere ganw se aage nikal gae

aisa bhi to mumkin hai mile be-talab ek muzhda-e-manzil

hum apni du'aon se tamannaon se aage nikal gae

kahte hain ki jismon ko ek ruh-e-muqaddas ki du'a hai

wo jism ki jo apne thake panw se aage nikal gae

thoDa sa bhi jin logon ko ’irfan-e-mazahib tha wo bach kar

kabon se shiwalon se kalisaon se aage nikal gae

the hum bhi gunahgar par ek zahid-e-makkar ki zid

bazar mein bikti hui salmaon se aage nikal gae

shahron ke makinon se mili jab hamein wahshat ki zamanat

hum si ke garebanon ko sahraon se aage nikal gae

banti rahi ek duniya 'qatil' apni KHaridar magar hum

yusuf na bane aur zuleKHaon se aage nikal gae