گاتے ہوئے پیڑوں کی خنک چھاؤں سے آگے نکل گئے

گاتے ہوئے پیڑوں کی خنک چھاؤں سے آگے نکل گئے

ہم دھوپ میں جلنے کو ترے گاؤں سے آگے نکل گئے

ایسا بھی تو ممکن ہے ملے بے طلب اک مژدۂ منزل

ہم اپنی دعاوں سے تمناؤں سے آگے نکل گئے

کہتے ہیں کہ جسموں کو اک روح مقدس کی دعا ہے

وہ جسم کہ جو اپنے تھکے پاؤں سے آگے نکل گئے

تھوڑا سا بھی جن لوگوں کو عرفان مذاہب تھا وہ بچ کر

کعبوں سے شوالوں سے کلیساؤں سے آگے نکل گئے

تھے ہم بھی گنہ گار پر اک زاہد مکار کی ضد

بازار میں بکتی ہوئی سلماؤں سے آگے نکل گئے

شہروں کے مکینوں سے ملی جب ہمیں وحشت کی ضمانت

ہم سی کے گریبانوں کو صحراؤں سے آگے نکل گئے

بنتی رہی اک دنیا قتیلؔ اپنی خریدار مگر ہم

یوسف نہ بنے اور زلیخاؤں سے آگے نکل گئے