hasinon mein sabhi kuchh hai jafa bhi hai wafa bhi hai

hasīnoñ meñ sabhī kuchh hai jafā bhī hai vafā bhī hai

nigāh-e-nāzāñ kī dard bhī hai aur davā bhī hai

sunī sab se shikāyat bārhā nā-āshnā.ī kī

tū ai nā-āshnā āḳhir kisī kā āshnā bhī hai

vuhūsh-o-tair ko bhī hai ḳhudā hī rizq pahuñchātā

takeñ dar ġhair kā kyuuñ ham vahī apnā ḳhudā bhī hai

kaheñ kyuuñ dūsroñ se hājateñ aur mushkileñ apnī

vahī hājat-ravā apnā vahī mushkil-kushā bhī hai

hameñ jannat kī kyā parvā hameñ dozaḳh kā kyā khaTkā

shafī’-ul-muznabīñ jaisā hamārā peshvā bhī hai

bashar kā zikr kyā husn-e-’āfrīñ hai shefta jis par

hasīnoñ meñ hasīñ ab tak koī aisā huā bhī hai

usī ke intizār-e-dīd meñ hairān hai nargis

usī ke 'ishq meñ ḳhūnīñ-jigar barg-e-hinā bhī hai

mile miTTī mirī ai kaash ḳhāk-e-pāk-e-taiba meñ

yahī dil kī tamannā hai yahī lab par du'ā bhī hai

nahīñ rahne kī jā duniyā 'jamālī' fikr-e-’uqbā kar

hamesha koī duniyā meñ are nādāñ rahā bhī hai

hasinon mein sabhi kuchh hai jafa bhi hai wafa bhi hai

nigah-e-nazan ki dard bhi hai aur dawa bhi hai

suni sab se shikayat barha na-ashnai ki

tu ai na-ashna aaKHir kisi ka aashna bhi hai

wuhush-o-tair ko bhi hai KHuda hi rizq pahunchata

taken dar ghair ka kyun hum wahi apna KHuda bhi hai

kahen kyun dusron se hajaten aur mushkilen apni

wahi hajat-rawa apna wahi mushkil-kusha bhi hai

hamein jannat ki kya parwa hamein dozaKH ka kya khaTka

shafi’-ul-muznabin jaisa hamara peshwa bhi hai

bashar ka zikr kya husn-e-’afrin hai shefta jis par

hasinon mein hasin ab tak koi aisa hua bhi hai

usi ke intizar-e-did mein hairan hai nargis

usi ke 'ishq mein KHunin-jigar barg-e-hina bhi hai

mile miTTi meri ai kash KHak-e-pak-e-taiba mein

yahi dil ki tamanna hai yahi lab par du'a bhi hai

nahin rahne ki ja duniya 'jamali' fikr-e-’uqba kar

hamesha koi duniya mein are nadan raha bhi hai