حسینوں میں سبھی کچھ ہے جفا بھی ہے وفا بھی ہے

حسینوں میں سبھی کچھ ہے جفا بھی ہے وفا بھی ہے

نگاہ نازاں کی درد بھی ہے اور دوا بھی ہے

سنی سب سے شکایت بارہا ناآشنائی کی

تو اے نا آشنا آخر کسی کا آشنا بھی ہے

وحوش و طیر کو بھی ہے خدا ہی رزق پہنچاتا

تکیں در غیر کا کیوں ہم وہی اپنا خدا بھی ہے

کہیں کیوں دوسروں سے حاجتیں اور مشکلیں اپنی

وہی حاجت روا اپنا وہی مشکل کشا بھی ہے

ہمیں جنت کی کیا پروا ہمیں دوزخ کا کیا کھٹکا

شفیع المذنبیں جیسا ہمارا پیشوا بھی ہے

بشر کا ذکر کیا حسن آفریں ہے شیفتہ جس پر

حسینوں میں حسیں اب تک کوئی ایسا ہوا بھی ہے

اسی کے انتظار دید میں حیران ہے نرگس

اسی کے عشق میں خونیں جگر برگ حنا بھی ہے

ملے مٹی مری اے کاش خاک پاک طیبہ میں

یہی دل کی تمنا ہے یہی لب پر دعا بھی ہے

نہیں رہنے کی جا دنیا جمالیؔ فکر عقبیٰ کر

ہمیشہ کوئی دنیا میں ارے ناداں رہا بھی ہے