mujhe dard tu ne baKHsha ye karam nahin to kya hai

mujhe dard tū ne baḳhshā ye karam nahīñ to kyā hai

mujhe apnā tū ne samjhā ye karam nahīñ to kyā hai

ye naqāb ruḳh se ulTā ye karam nahīñ to kyā hai

mirī samt tū ne dekhā ye karam nahīñ to kyā hai

tirā dard khīñch laayā tā-'ishq le ke aayā

mujhe dar pe ḳhud bulāyā ye karam nahīñ to kyā hai

jise ḳhvāhish-e-sūkūñ thī jise terī justujū thī

tū usī ke dil meñ aayā ye karam nahīñ to kyā hai

jo thā baar ik zamīñ par jo thā do-jahāñ meñ rusvā

use 'arsh par biThāyā ye karam nahīñ to kyā hai

tirī jis pe paḌ ga.ī hai ye nigāh-e-mahramāna

vahī ho gayā hai yaktā ye karam nahīñ to kyā hai

mirī hastī-e-pareshāñ mirī zindagī thī tūfāñ

use ik sukūn baḳhshā ye karam nahīñ to kyā hai

vahī ‘rāz-e-be-navā hai na thā jis kā kuchh Thikāna

use lutf se navāzā ye karam nahīñ to kyā hai

mujhe dard tu ne baKHsha ye karam nahin to kya hai

mujhe apna tu ne samjha ye karam nahin to kya hai

ye naqab ruKH se ulTa ye karam nahin to kya hai

meri samt tu ne dekha ye karam nahin to kya hai

tera dard khinch laya ta-'ishq le ke aaya

mujhe dar pe KHud bulaya ye karam nahin to kya hai

jise KHwahish-e-sukun thi jise teri justuju thi

tu usi ke dil mein aaya ye karam nahin to kya hai

jo tha bar ek zamin par jo tha do-jahan mein ruswa

use 'arsh par biThaya ye karam nahin to kya hai

teri jis pe paD gai hai ye nigah-e-mahramana

wahi ho gaya hai yakta ye karam nahin to kya hai

meri hasti-e-pareshan meri zindagi thi tufan

use ek sukun baKHsha ye karam nahin to kya hai

wahi ‘raaz-e-be-nawa hai na tha jis ka kuchh Thikana

use lutf se nawaza ye karam nahin to kya hai