rakha na ab kahin ka dil-e-be-qarar ne

rakhā na ab kahīñ kā dil-e-be-qarār ne

barbād kar diyā ġham-e-be-ikHtiyār ne

dil to kabhī kā nazr kiyā jāñ-nisār ne

ik jaañ hai vo bhī aap kā sadqa utārne

is fitna-gar ko jiit liyā haar maan kar

kyā-kyā maza diyā hameñ is jiit haar ne

pahlū badal-badal ke maze dard ke liye

vo karvaTeñ dikhā.īñ dil-e-be-qarār ne

ab ḳhvāb meñ bhī diid ko āñkheñ taras ga.iiñ

be-ḳhvāb kar diyā ġham-e-shab-zinda-dār ne

vo fasl-e-gul meñ dil ko jalā kar chale ga.e

is martaba to aag lagā dī bahār ne

ḳhāmosh bhī huuñ maiñ to mujhe sun rahe haiñ vo

itnā to kar diyā mire dil kī pukār ne

sau-sau tarah kī maut se paalā paḌā hameñ

kyā-kyā karam kiyā hai tire intizār ne

duniyā-e-nutq bah ga.ī sailāb-e-ashk meñ

pūchhā jo ham se haal kisī ġham-gusār ne

nādāñ pukār us ko jo suntā hai terī baat

tū us ko chhoḌ kis ko chalā hai pukārne

'kāmil' nigāh us kī jamī jis pe jam ga.ī

chāhā jise pasand kiyā chashm-e-yār ne

rakha na ab kahin ka dil-e-be-qarar ne

barbaad kar diya gham-e-be-ikHtiyar ne

dil to kabhi ka nazr kiya jaan-nisar ne

ek jaan hai wo bhi aap ka sadqa utarne

is fitna-gar ko jit liya haar man kar

kya-kya maza diya hamein is jit haar ne

pahlu badal-badal ke maze dard ke liye

wo karwaTen dikhain dil-e-be-qarar ne

ab KHwab mein bhi did ko aankhen taras gain

be-KHwab kar diya gham-e-shab-zinda-dar ne

wo fasl-e-gul mein dil ko jala kar chale gae

is martaba to aag laga di bahaar ne

KHamosh bhi hun main to mujhe sun rahe hain wo

itna to kar diya mere dil ki pukar ne

sau-sau tarah ki maut se pala paDa hamein

kya-kya karam kiya hai tere intizar ne

duniya-e-nutq bah gai sailab-e-ashk mein

puchha jo hum se haal kisi gham-gusar ne

nadan pukar us ko jo sunta hai teri baat

tu us ko chhoD kis ko chala hai pukarne

'kaamil' nigah us ki jami jis pe jam gai

chaha jise pasand kiya chashm-e-yar ne