hur par aankh na Dale kabhi shaida tera

huur par aañkh na Daale kabhī shaidā terā

sab se begāna hai ai dost shanāsā terā

shaan arfa’ hai tirī martaba aa’lā terā

tū hai yaktā koī saanī nahīñ haqqā terā

'aql kyā daḳhl kare kunh-e-haqīqat meñ terī

hausla past mirā martaba aa’lā terā

raah meñ us kī jo sābit-qadamī ho tujh se

sajda-gah jaane malak naqsh-e-kaf-e-pā terā

justujū meñ jo na dauḌeñ tirī TūTeñ vo paañv

sar vo kaT jaa.e na ho jis meñ ki saudā terā

tuuhī ne us ko banāyā hai yad-e-qudrat se

tuuhī chāhegā to bigḌegā ye putlā terā

dīd-e-lailā ke liye dīda-e-majnūñ hai zarūr

merī āñkhoñ se koī dekhe tamāshā terā

ek 'ālam ko tire naam kā hai vird ai dost

maiñ hī kuchh zikr nahīñ karatā huuñ tanhā terā

maiñ bhī dekhūñgā dikhā mujh ko tajllā-e-jamāl

maiñ bhī shā.eq huuñ sanam sūrat-e-mūsā terā

kis kī āñkhoñ se hai dā'va tujhe ham-chashmī kā

kis taraf dhyān hai o nargis-e-shahlā terā

maiñ musāfir huuñ utar jā.ūñgā paar ik dam meñ

tujh ko ai mauj mubārak rahe dariyā terā

qasd kar ke nahīñ khīñchā qalam qudrat ne

ḳhud-baḳhud ban gayā be-sāḳhta naqshā terā

chashm-o-abrū bhī agar terī sahī hotī us kī

ho chukā thā ruḳh-e-ḳhurshīd pe dhokā terā

rashk-e-bilqīs banāyā hai ḳhudā ne mujh ko

badlūñ ḳhātim se sulaimāñ ke na chhallā terā

baiThe takiya bhī lagā kar na kabhī us din se

ham faqīroñ ne liyā jab se sahārā terā

pech-o-tāb is qadar ai mauj 'abas hai tujh ko

rol devegā na motī mujhe dariyā terā

paak dāmānī meñ terī nahīñ paḌne kā ḳhalal

apne mushtāqoñ se nāhaq hai ye pardā terā

tujh se bezār ho jaatā sū-e-mulk-e-'adam

muñh na dikhlā.e ḳhudā phir mujhe duniyā terā

iḳhtiyārī nahīñ har baar bane aisī hī shakl

khiñch gayā sāne’-e-ījād se naqshā terā

be-bahā jins hai to ahl-e-jahāñ be-maqdūr

mere yūsuf na banegā yahāñ saudā terā

’āshiq-e-rū-e-parī shefta-e-hūr nahīñ

jān-e-jāñ 'rind' hai dīvāna-o-shaidā terā

hur par aankh na Dale kabhi shaida tera

sab se begana hai ai dost shanasa tera

shan arfa’ hai teri martaba aa’la tera

tu hai yakta koi sani nahin haqqa tera

'aql kya daKHl kare kunh-e-haqiqat mein teri

hausla past mera martaba aa’la tera

rah mein us ki jo sabit-qadami ho tujh se

sajda-gah jaane malak naqsh-e-kaf-e-pa tera

justuju mein jo na dauDen teri TuTen wo panw

sar wo kaT jae na ho jis mein ki sauda tera

tuhi ne us ko banaya hai yad-e-qudrat se

tuhi chahega to bigDega ye putla tera

did-e-laila ke liye dida-e-majnun hai zarur

meri aankhon se koi dekhe tamasha tera

ek 'alam ko tere nam ka hai wird ai dost

main hi kuchh zikr nahin karata hun tanha tera

main bhi dekhunga dikha mujh ko tajlla-e-jamal

main bhi shaeq hun sanam surat-e-musa tera

kis ki aankhon se hai da'wa tujhe ham-chashmi ka

kis taraf dhyan hai o nargis-e-shahla tera

main musafir hun utar jaunga par ek dam mein

tujh ko ai mauj mubarak rahe dariya tera

qasd kar ke nahin khincha qalam qudrat ne

KHud-baKHud ban gaya be-saKHta naqsha tera

chashm-o-abru bhi agar teri sahi hoti us ki

ho chuka tha ruKH-e-KHurshid pe dhoka tera

rashk-e-bilqis banaya hai KHuda ne mujh ko

badlun KHatim se sulaiman ke na chhalla tera

baiThe takiya bhi laga kar na kabhi us din se

hum faqiron ne liya jab se sahaara tera

pech-o-tab is qadar ai mauj 'abas hai tujh ko

rol dewega na moti mujhe dariya tera

pak damani mein teri nahin paDne ka KHalal

apne mushtaqon se nahaq hai ye parda tera

tujh se bezar ho jata su-e-mulk-e-'adam

munh na dikhlae KHuda phir mujhe duniya tera

iKHtiyari nahin har bar bane aisi hi shakl

khinch gaya sane’-e-ijad se naqsha tera

be-baha jins hai to ahl-e-jahan be-maqdur

mere yusuf na banega yahan sauda tera

’ashiq-e-ru-e-pari shefta-e-hur nahin

jaan-e-jaan 'rind' hai diwana-o-shaida tera