mujh bala-nosh ko talchhaT bhi hai kafi saqi

mujh balā-nosh ko talchhaT bhī hai kaafī saaqī

bhar de chullū meñ jo ho shīshe meñ baaqī saaqī

bhar ke pilvātā nahīñ ek pyālī saaqī

saarī maiñ māñgtā huuñ detā hai aadhī saaqī

tū ne kyā ātish-e-hal-karda pilā dī saaqī

bhuun Daalā hai jigar aag lagā dī saaqī

phuul māñgūñ to pilātā hai brānḌī saaqī

karatā hai bazm-e-guzashta kī talāfī saaqī

jām-e-jam chāhiye rindoñ ko na shāhī saaqī

saltanat hai tire kūcha kī gadā.ī saaqī

jaam auroñ ko diye mujh ko pyālī saaqī

ḳhud bahakne lagā mānind-e-sharābī saaqī

kyā karūñ pī ke bhalā ek pyālī saaqī

us tunuk-zarfī kā banda nahīñ 'aadī saaqī

kab se kahtā huuñ balā-nosh meñ saaqī saaqī

aur pilvā de jo ho shīsha meñ baaqī saaqī

maraz hijr meñ mai garche muzir hai lekin

maiñ to pī jaatā huuñ allāh hai saaqī saaqī

sub.h se shaam talak haath se chhuTtā nahīñ jaam

chāhiye apnā taḳhallus kare 'jāmī' saaqī

maslahat hogī jo mahrūm rakhā mai se mujhe

fe'l hikmat se nahīñ hai tirā ḳhālī saaqī

mast kyā jāneñ kidhar dair hai kā'ba hai kahāñ

'umr saarī tirī bhaTTī meñ guzārī saaqī

masjid-o-dair-o-kalīsā kī vo raunaq na rahī

tū ne buniyād jo mai-ḳhāne kī Daalī saaqī

dekhiye sohbat-e-nā-jins nibhegī kyuuñ kar

past himmat to tabī'at mirī 'aalī saaqī

fasl-e-gul aa chukī kyā duur se dahkātā hai

mai-e-gul-rañg se bhar bhar ke gulābī saaqī

vā'izo vahī karūñgā maiñ jo fatvā degā

qibla-o-kā'ba-o-murshid mirā haadī saaqī

shīsha-o-jām-o-subū hoñge abhī chaknā-chūr

mast bahke to baḌī hogī ḳharābī saaqī

koī aafat tire mai-ḳhāne pe aa saktī hai

sab du'ā-go haiñ ye jitne haiñ sharābī saaqī

sirf lillāh bhī mai-ḳhāne meñ jaarī kar de

muqtazī ho jo tirī himmat-e-'ālī saaqī

tañg ho kar tire har baar ke dahkāne se

kos baiThe na koī riñd sharābī saaqī

jo piyegā na sharāb aaj vo mujrim hogā

kū-ba-kū kal se to kar de ye munādī saaqī

dard bhī mujh ko pilā degā tū bad-mastī meñ

sab sunā dūñgā maiñ dīvān-e-zulālī saaqī

barf pilvā ke kaleja mirā ThanDā kar de

aab añgūr ne to aag lagā dī saaqī

terā jī chāhe to pilvā de koī jām-e-sharāb

haath phailāne kā banda nahīñ 'aadī saaqī

nafas-e-garm kī tāsīr ne mai-e-sāġhar se

sho.ala-e-lafz ke mānind uḌā dī saaqī

aur to hasrateñ sab 'rind' ke dil se niklīñ

jām-e-kausar kī tamannā rahī baaqī saaqī

mujh bala-nosh ko talchhaT bhi hai kafi saqi

bhar de chullu mein jo ho shishe mein baqi saqi

bhar ke pilwata nahin ek pyali saqi

sari main mangta hun deta hai aadhi saqi

tu ne kya aatish-e-hal-karda pila di saqi

bhun Dala hai jigar aag laga di saqi

phul mangun to pilata hai branDi saqi

karata hai bazm-e-guzashta ki talafi saqi

jam-e-jam chahiye rindon ko na shahi saqi

saltanat hai tere kucha ki gadai saqi

jam auron ko diye mujh ko pyali saqi

KHud bahakne laga manind-e-sharabi saqi

kya karun pi ke bhala ek pyali saqi

us tunuk-zarfi ka banda nahin 'adi saqi

kab se kahta hun bala-nosh mein saqi saqi

aur pilwa de jo ho shisha mein baqi saqi

maraz hijr mein mai garche muzir hai lekin

main to pi jata hun allah hai saqi saqi

subh se sham talak hath se chhuTta nahin jam

chahiye apna taKHallus kare 'jami' saqi

maslahat hogi jo mahrūm rakha mai se mujhe

fe'l hikmat se nahin hai tera KHali saqi

mast kya jaanen kidhar dair hai ka'ba hai kahan

'umr sari teri bhaTTi mein guzari saqi

masjid-o-dair-o-kalisa ki wo raunaq na rahi

tu ne buniyaad jo mai-KHane ki Dali saqi

dekhiye sohbat-e-na-jins nibhegi kyun kar

past himmat to tabi'at meri 'ali saqi

fasl-e-gul aa chuki kya dur se dahkata hai

mai-e-gul-rang se bhar bhar ke gulabi saqi

wa'izo wahi karunga main jo fatwa dega

qibla-o-ka'ba-o-murshid mera hadi saqi

shisha-o-jam-o-subu honge abhi chakna-chur

mast bahke to baDi hogi KHarabi saqi

koi aafat tere mai-KHane pe aa sakti hai

sab du'a-go hain ye jitne hain sharabi saqi

sirf lillah bhi mai-KHane mein jari kar de

muqtazi ho jo teri himmat-e-'ali saqi

tang ho kar tere har bar ke dahkane se

kos baiThe na koi rind sharabi saqi

jo piyega na sharab aaj wo mujrim hoga

ku-ba-ku kal se to kar de ye munadi saqi

dard bhi mujh ko pila dega tu bad-masti mein

sab suna dunga main diwan-e-zulali saqi

barf pilwa ke kaleja mera ThanDa kar de

aab angur ne to aag laga di saqi

tera ji chahe to pilwa de koi jam-e-sharab

hath phailane ka banda nahin 'adi saqi

nafas-e-garm ki tasir ne mai-e-saghar se

shoala-e-lafz ke manind uDa di saqi

aur to hasraten sab 'rind' ke dil se niklin

jam-e-kausar ki tamanna rahi baqi saqi