ai pari yaad hai wo naz se aana tera

ai parī yaad hai vo naaz se aanā terā

muñh ko sharmā ke doshāle meñ chhupānā terā

āñkheñ nīchī kiye sharmā.e hue muñh phere

muskurā kar vo gilaurī kā chabānā terā

saañp sā loTtā hai chhātī pe jab aatā hai yaad

bigḌī zulfoñ kā vo har baar banānā terā

jān-e-jāñ yaad hai bose ke liye vasl kī shab

minnateñ karnā mirā muñh kā chhupānā terā

ek ik chiiz ko meñ yaad kiyā karatā huuñ

kabhī choTī kabhī gardan kabhī shānā terā

minnateñ maan yaañ dargāhoñ meñ chale bāñdhe

par mayassar na huā saath sulānā terā

kahiyo ai bād-e-sabā martā hai 'āshiq terā

kūcha-e-yār meñ gar ho kabhī jaanā terā

kitnā samjhāyā samajhtā nahīñ tū o zālim

dil-e-betāb yahī hai jo satāna terā

Dāltā huuñ kisī jallād ke paale tujh ko

aaj hī kal meñ lagātā huuñ Thikānā terā

dekh kar kūche meñ apne mujhe bolā vo shoḳh

nahīñ kambaḳht kahīñ aur Thikānā terā

jab maiñ rotā huuñ to hañs kar mujhe farmāte haiñ

āñkheñ phoḌegā 'abas ashk bahānā terā

dil-e-betāb ghaḌī bhar to mujhe sone de

qahr hai roz kā rātoñ kā jagānā terā

aaj mar jaane pe raazī hai tire sar kī qasam

ho yaqīñ mujh ko agar gor pe aanā terā

dam meñ dam baaqī hai jab tak na uThā yaar se haath

'rind' dushman hai to ho saarā zamāna terā

ai pari yaad hai wo naz se aana tera

munh ko sharma ke doshaale mein chhupana tera

aankhen nichi kiye sharmae hue munh phere

muskura kar wo gilauri ka chabana tera

sanp sa loTta hai chhati pe jab aata hai yaad

bigDi zulfon ka wo har bar banana tera

jaan-e-jaan yaad hai bose ke liye wasl ki shab

minnaten karna mera munh ka chhupana tera

ek ek chiz ko mein yaad kiya karata hun

kabhi choTi kabhi gardan kabhi shana tera

minnaten man yan dargahon mein chale bandhe

par mayassar na hua sath sulana tera

kahiyo ai baad-e-saba marta hai 'ashiq tera

kucha-e-yar mein gar ho kabhi jaana tera

kitna samjhaya samajhta nahin tu o zalim

dil-e-betab yahi hai jo satana tera

Dalta hun kisi jallad ke pale tujh ko

aaj hi kal mein lagata hun Thikana tera

dekh kar kuche mein apne mujhe bola wo shoKH

nahin kambaKHt kahin aur Thikana tera

jab main rota hun to hans kar mujhe farmate hain

aankhen phoDega 'abas ashk bahana tera

dil-e-betab ghaDi bhar to mujhe sone de

qahr hai roz ka raaton ka jagana tera

aaj mar jaane pe raazi hai tere sar ki qasam

ho yaqin mujh ko agar gor pe aana tera

dam mein dam baqi hai jab tak na uTha yar se hath

'rind' dushman hai to ho sara zamana tera