aap aae to KHayal-e-dil-e-nashad aaya

aap aa.e to ḳhayāl-e-dil-e-nāshād aayā

aap ne yaad dilāyā to mujhe yaad aayā

'arsh se aaj asar tā-lab-e-fariyād aayā

ek hī aah meñ kāfir ko ḳhudā yaad aayā

jaur ke saath tirā lutf bhī kuchh yaad aayā

hoñT par ban ke hañsī shikva-e-bedād aayā

aaj shab meñ koī sau baar to bijlī chamkī

aaj din meñ koī sau baar to sayyād aayā

mere dil meñ 'ajab andāz se aayā nāvak

maiñ ye samjhā koī mā'shūq parī-zād aayā

kyā kahā phir to kaho bhuul ga.e ham kis ko

sadqe us ke jo tumheñ bhuul ke yuuñ yaad aayā

fitna-e-hashr ne bhī uTh ke balā.eñ le liiñ

'ajab andāz se merā sitam-ījād aayā

san se jhoñkā koī aayā jo tirā bād-e-bahār

chauñk uTThe murġh-e-chaman nāvak-e-sayyād aayā

are qātil abhī bah jā.egā paanī ho kar

sāmne mere agar ḳhanjar-e-faulād aayā

yahī gulshan kī havā hai yahī gulshan kī bahār

kabhī sayyād kabhī nāvak-e-bedād aayā

nazar aatī haiñ kahīñ aisī bhī kāfir shakleñ

dekh kar husn-e-ḳhudā-dād ḳhudā yaad aayā

paas se nīm-nigah duur se mizhgān-e-darāz

chubhne vaale na.e nashtar liye fassād aayā

na sunā ham ne kabhī baaġh meñ aa.ī hai bahār

jo sunā bhī to sunā ham ne ki sayyād aayā

kyuuñ nigāheñ ye gaḌhī haiñ shikan dāman par

sadqe andāz hayā ke tujhe dil yaad aayā

āshiyāñ barq ko sauñpā mujhe aa.ī jo tarañg

aur maiñ uḌ ke idhar tā-kaf-e-sayyād aayā

asar aayā bhī to jaise koī fariyādī ho

haath meñ thāme hue dāman-e-fariyād aayā

dast-e-mātam liye baiThī rahī shīrīñ apne

tesha achchhā ki tire kaam to farhād aayā

aisī zid hai to unheñ kaun manā.e yā rab

vo ye machle haiñ ki koī mujhe kyuuñ yaad aayā

liye ḳhanjar kī ravānī thī har ik mauj-e-ḳhirām

aaj maqtal meñ na.ī shaan se jallād aayā

maiñ jo pahuñchā to liye uTh ke bagūloñ ne qadam

najd meñ dhuum machī qais kā ustād aayā

baḌh ke le halqa-e-āġhosh meñ ai dast-e-junoñ

beḌiyāñ kāTne kis lutf se haddād aayā

Dar ke sahrā-e-balā se jo pukārā maiñ ne

qais ne dī mujhe āvāz ki farhād aayā

sadqe hoñToñ ke jinheñ nāz-e-masīhā.ī hai

sadqe bātoñ ke jinheñ sheva-e-jallād aayā

de uThīñ ḳhuun rageñ naam jo nashtar kā liyā

rañg aisā mirī tasvīr meñ bahzād aayā

tifl-e-ashk aa ke mirī god meñ machle jo 'riyāz'

dil-e-marhūm mujhe aaj bahut yaad aayā

aap aae to KHayal-e-dil-e-nashad aaya

aap ne yaad dilaya to mujhe yaad aaya

'arsh se aaj asar ta-lab-e-fariyaad aaya

ek hi aah mein kafir ko KHuda yaad aaya

jaur ke sath tera lutf bhi kuchh yaad aaya

honT par ban ke hansi shikwa-e-bedad aaya

aaj shab mein koi sau bar to bijli chamki

aaj din mein koi sau bar to sayyaad aaya

mere dil mein 'ajab andaz se aaya nawak

main ye samjha koi ma'shuq pari-zad aaya

kya kaha phir to kaho bhul gae hum kis ko

sadqe us ke jo tumhein bhul ke yun yaad aaya

fitna-e-hashr ne bhi uTh ke balaen le lin

'ajab andaz se mera sitam-ijad aaya

san se jhonka koi aaya jo tera baad-e-bahaar

chaunk uTThe murgh-e-chaman nawak-e-sayyaad aaya

are qatil abhi bah jaega pani ho kar

samne mere agar KHanjar-e-faulad aaya

yahi gulshan ki hawa hai yahi gulshan ki bahaar

kabhi sayyaad kabhi nawak-e-bedad aaya

nazar aati hain kahin aisi bhi kafir shaklen

dekh kar husn-e-KHuda-dad KHuda yaad aaya

pas se nim-nigah dur se mizhgan-e-daraaz

chubhne wale nae nashtar liye fassad aaya

na suna hum ne kabhi bagh mein aai hai bahaar

jo suna bhi to suna hum ne ki sayyaad aaya

kyun nigahen ye gaDhi hain shikan daman par

sadqe andaz haya ke tujhe dil yaad aaya

aashiyan barq ko saunpa mujhe aai jo tarang

aur main uD ke idhar ta-kaf-e-sayyaad aaya

asar aaya bhi to jaise koi fariyaadi ho

hath mein thame hue daman-e-fariyaad aaya

dast-e-matam liye baiThi rahi shirin apne

tesha achchha ki tere kaam to farhad aaya

aisi zid hai to unhen kaun manae ya rab

wo ye machle hain ki koi mujhe kyun yaad aaya

liye KHanjar ki rawani thi har ek mauj-e-KHiram

aaj maqtal mein nai shan se jallad aaya

main jo pahuncha to liye uTh ke bagulon ne qadam

najd mein dhum machi qais ka ustad aaya

baDh ke le halqa-e-aghosh mein ai dast-e-junon

beDiyan kaTne kis lutf se haddad aaya

Dar ke sahra-e-bala se jo pukara main ne

qais ne di mujhe aawaz ki farhad aaya

sadqe honTon ke jinhen naz-e-masihai hai

sadqe baaton ke jinhen shewa-e-jallad aaya

de uThin KHun ragen nam jo nashtar ka liya

rang aisa meri taswir mein bahzad aaya

tifl-e-ashk aa ke meri god mein machle jo 'riyaz'

dil-e-marhum mujhe aaj bahut yaad aaya