ruKH se parda haTa de zara saqiya bas abhi rang-e-mahfil badal jaega

ruḳh se parda haTā de zarā sāqiyā bas abhī rañg-e-mahfil badal jā.egā

jo hai behosh vo hosh meñ aa.egā girne vaalā jo hai vo sambhal jā.egā

tum tasallī na do sirf baiThe raho mere marne kā kuchh vaqt Tal jā.egā

kyā ye kam hai masīhā ke rahne hī se maut kā bhī irāda badal jā.egā

apne parde kā rakhnā magar kuchh bharam sāmne aanā jaanā munāsib nahīñ

ek vahshī se ye chheḌ achchhī nahīñ kyā karoge agar ye machal jā.egā

merā dāman to jal hī chukā hai magar aañch tum par bhī aa.e gavārā nahīñ

mere aañsū na poñchho ḳhudā ke liye varna dāman tumhārā bhī jal jā.egā

phuul kuchh is tarah toḌ ai bāġhbāñ shāḳh hilne na paa.e na āvāz ho

varna gulshan pe raunaq na phir aa.egī dil agar har kisī kā dahal jā.egā

log samjhe the ye inqilāb aate hī nazm-e-kohna chaman kā badal jā.egā

ye ḳhabar kis ko thī ātish-e-gul se hī tinkā-tinkā nasheman kā jal jā.egā

ik muddat huī us ko rote hue ek 'arsa huā muskurā.e hue

zabt-e-ġham kā ab aur us se va'ada na lo varna bīmār kā dam nikal jā.egā

ruKH se parda haTa de zara saqiya bas abhi rang-e-mahfil badal jaega

jo hai behosh wo hosh mein aaega girne wala jo hai wo sambhal jaega

tum tasalli na do sirf baiThe raho mere marne ka kuchh waqt Tal jaega

kya ye kam hai masiha ke rahne hi se maut ka bhi irada badal jaega

apne parde ka rakhna magar kuchh bharam samne aana jaana munasib nahin

ek wahshi se ye chheD achchhi nahin kya karoge agar ye machal jaega

mera daman to jal hi chuka hai magar aanch tum par bhi aae gawara nahin

mere aansu na ponchho KHuda ke liye warna daman tumhaara bhi jal jaega

phul kuchh is tarah toD ai baghban shaKH hilne na pae na aawaz ho

warna gulshan pe raunaq na phir aaegi dil agar har kisi ka dahal jaega

log samjhe the ye inqilab aate hi nazm-e-kohna chaman ka badal jaega

ye KHabar kis ko thi aatish-e-gul se hi tinka-tinka nasheman ka jal jaega

ek muddat hui us ko rote hue ek 'arsa hua muskurae hue

zabt-e-gham ka ab aur us se wa'ada na lo warna bimar ka dam nikal jaega