aaya jo mausam-e-gul to ye hisab hoga

aayā jo mausam-e-gul to ye hisāb hogā

ham hoñge yaar hogā jām-e-sharāb hogā

ai zāhid-e-riyā.ī dekhī namāz terī

nīyat agar yahī hai to kyā savāb hogā

vo radd-e-ḳhalq huuñ maiñ gar Duub kar marūñgā

murda mirā vhaañ se dosh-e-hubāb hogā

vo rind huuñ maiñ zāhid aane de hashr kā din

us roz bhī ye banda mast-e-sharāb hogā

ai charḳh-e-pīr ab to ye haal hai sitam kā

kyā hogā jin dinoñ meñ terā shabāb hogā

īmān tum 'sabā' kā us vaqt dekh lenā

āñkhoñ meñ dam laboñ par yā bū-turāb hogā

aaya jo mausam-e-gul to ye hisab hoga

hum honge yar hoga jam-e-sharab hoga

ai zahid-e-riyai dekhi namaz teri

niyat agar yahi hai to kya sawab hoga

wo radd-e-KHalq hun main gar Dub kar marunga

murda mera whan se dosh-e-hubab hoga

wo rind hun main zahid aane de hashr ka din

us roz bhi ye banda mast-e-sharab hoga

ai charKH-e-pir ab to ye haal hai sitam ka

kya hoga jin dinon mein tera shabab hoga

iman tum 'saba' ka us waqt dekh lena

aankhon mein dam labon par ya bu-turab hoga