آیا جو موسم گل تو یہ حساب ہوگا

آیا جو موسم گل تو یہ حساب ہوگا

ہم ہوں گے یار ہوگا جام شراب ہوگا

اے زاہد ریائی دیکھی نماز تیری

نیت اگر یہی ہے تو کیا ثواب ہوگا

وہ ردِّ خلق ہوں میں گر ڈوب کر مروں گا

مردہ مرا وہاں سے دوش حباب ہوگا

وہ رند ہوں میں زاہد آنے دے حشر کا دن

اس روز بھی یہ بندہ مست شراب ہوگا

اے چرخ پیر اب تو یہ حال ہے ستم کا

کیا ہوگا جن دنوں میں تیرا شباب ہوگا

ایمان تم صباؔ کا اس وقت دیکھ لینا

آنکھوں میں دم لبوں پر یا بوتراب ہوگا