rashk-e-barq-e-tur sham-e-mahfil-e-jaanana hai

rashk-e-barq-e-tūr sham-e'-mahfil-e-jānāna hai

māh-e-nau TuuTā huā is bazm kā paimāna hai

kufr kā fatve lagātā hai har ik mai-ḳhvār par

’aql par patthar paḌe haiñ shaiḳh kā dīvāna hai

jaan se ’ushshāq jaate haiñ ḳhabar lete nahīñ

is jahāñ meñ koī hogā tum sā be-parvā na hai

hosh meñ aa ab na rakh sahrā-navardī se ġharaz

kuchh ḳhayāl-e-ābrū tujh ko dil-e-dīvāna hai

māh-e-tābāñ se fuzūñ hai husn meñ jis ke ziyā

us charāġh-e-bazm-e-rif’at kā ye dil parvāna hai

rakh na naḳhvat se qadam ġhāfil kar itnā to ḳhayāl

āsyā-e-charḳh ne piisā use jo daana hai

kyuuñ na uljhan meñ basar ho dosto lail-o-nahār

murġh-e-dil apnā asīr-e-gesū-e-jānāna hai

ho ke be-ḳhud nashsha-e-mai se zamīñ par gir paḌe

bas yahī rindoñ kā saaqī sajda-e-shukrāna hai

vaañ vo gul mashġhūl hai sair-e-gulistāñ meñ 'sa’īd'

yā chhalakne ko hamārī umr kā paimāna hai

rashk-e-barq-e-tur sham-e'-mahfil-e-jaanana hai

mah-e-nau TuTa hua is bazm ka paimana hai

kufr ka fatwe lagata hai har ek mai-KHwar par

’aql par patthar paDe hain shaiKH ka diwana hai

jaan se ’ushshaq jate hain KHabar lete nahin

is jahan mein koi hoga tum sa be-parwa na hai

hosh mein aa ab na rakh sahra-nawardi se gharaz

kuchh KHayal-e-abru tujh ko dil-e-diwana hai

mah-e-taban se fuzun hai husn mein jis ke ziya

us charagh-e-bazm-e-rif’at ka ye dil parwana hai

rakh na naKHwat se qadam ghafil kar itna to KHayal

aasya-e-charKH ne pisa use jo dana hai

kyun na uljhan mein basar ho dosto lail-o-nahaar

murgh-e-dil apna asir-e-gesu-e-jaanana hai

ho ke be-KHud nashsha-e-mai se zamin par gir paDe

bas yahi rindon ka saqi sajda-e-shukrana hai

wan wo gul mashghul hai sair-e-gulistan mein 'sa’id'

ya chhalakne ko hamari umr ka paimana hai