hamare gudgudane se hansi jo un ko aati hai

hamāre gudgudāne se hañsī jo un ko aatī hai

dur-e-dandāñ chamakte haiñ ki bijlī kauñd jaatī hai

nazar vo pyaar kī terī hamārī bebasī us par

sitam kartī hai dil par qalb par chhuriyāñ chalātī hai

kashākash meñ paḌā huuñ ho ke tere vasl kā ḳhvāhāñ

tamannā jaan letī hai judā.ī qahr Dhātī hai

shab-e-vasl-e-sanam meñ to na aa.e murġh-e-sahar chalā

hamārā lutf jaatā hai tirī kyuuñ jaan jaatī hai

tarahhum ham pe karte ho magar milte nahīñ sāheb

tumhārī mehrbānī bhī hamārā dil dikhātī hai

‘safīr’-e-zār agar us yaar se tū lau lagātā hai

abhī dam-bhar meñ to terī murād-e-dil bar aatī hai

hamare gudgudane se hansi jo un ko aati hai

dur-e-dandan chamakte hain ki bijli kaund jati hai

nazar wo pyar ki teri hamari bebasi us par

sitam karti hai dil par qalb par chhuriyan chalati hai

kashakash mein paDa hun ho ke tere wasl ka KHwahan

tamanna jaan leti hai judai qahr Dhati hai

shab-e-wasl-e-sanam mein to na aae murgh-e-sahar chala

hamara lutf jata hai teri kyun jaan jati hai

tarahhum hum pe karte ho magar milte nahin saheb

tumhaari mehrbani bhi hamara dil dikhati hai

‘safir’-e-zar agar us yar se tu lau lagata hai

abhi dam-bhar mein to teri murad-e-dil bar aati hai