mariz-e-ishq ka kya hai jiya jiya na jiya

marīz-e-'ishq kā kyā hai jiyā jiyā na jiyā

hai ek saañs kā jhagḌā liyā liyā na liyā

badan hī aaj agar tār-tār hai merā

tū ek chāk-e-garebāñ siyā siyā na siyā

ye aur baat ki tū har rāh-e-ḳhayāl meñ hai

ki terā naam zabāñ se liyā liyā na liyā

mere hī naam pe aayā hai jaam mahfil meñ

ye aur baat ki maiñ ne piyā piyā na piyā

ye hāl-e-dil hai 'safī' maiñ to sochtā hī nahīñ

ki kyuuñ kisī ne sahārā diyā diyā na diyā

mariz-e-'ishq ka kya hai jiya jiya na jiya

hai ek sans ka jhagDa liya liya na liya

badan hi aaj agar tar-tar hai mera

tu ek chaak-e-gareban siya siya na siya

ye aur baat ki tu har rah-e-KHayal mein hai

ki tera nam zaban se liya liya na liya

mere hi nam pe aaya hai jam mahfil mein

ye aur baat ki main ne piya piya na piya

ye haal-e-dil hai 'safi' main to sochta hi nahin

ki kyun kisi ne sahaara diya diya na diya