sahaara maujon ka le-le ke baDh raha hun main

sahārā maujoñ kā le le ke baḌh rahā huuñ maiñ

safīna jis kā hai tūfāñ vo nāḳhudā huuñ maiñ

ḳhud apne jalva-e-hastī kā mubtalā huuñ maiñ

na mudda.ī huuñ kisī kā na mudda.ā huuñ maiñ

kuchh aage ālam-e-hastī se gūñjtā huuñ maiñ

ki dil se TuuTe hue saaz kī sadā huuñ maiñ

paḌā huā huuñ jahāñ jis tarah paḌā huuñ maiñ

jo tere dar se na uThe vo naqsh-e-pā huuñ maiñ

jahān-e-ishq meñ go paikar-e-vafā huuñ maiñ

tirī nigāh meñ jab kuchh nahīñ to kyā huuñ maiñ

tajalliyāt kī tasvīr khīñch kar dil meñ

tasavvurāt kī duniyā basā rahā huuñ maiñ

junūn-e-ishq kī nairañgiyāñ are tauba

kabhī ḳhudā huuñ kabhī banda-e-ḳhudā huuñ maiñ

badaltī rahtī hai duniyā mire ḳhayāloñ kī

kabhī milā huuñ kabhī yaar se judā huuñ maiñ

hayāt-o-maut ke jalve haiñ merī hastī meñ

taġhayyurāt-e-do-ālam kā aa.inā huuñ maiñ

tirī atā ke tasadduq tire karam ke nisār

ki ab to apnī nazar meñ bhī dūsrā huuñ maiñ

baqā kī fikr na andesha-e-fanā mujh ko

ta.ayyunāt kī had se guzar gayā huuñ maiñ

mujhī ko dekh leñ ab tere dekhne vaale

tū ā.īna hai mirā terā ā.īnā huuñ maiñ

maiñ miT gayā huuñ to phir kis kā naam hai 'bedam'

vo mil ga.e haiñ to phir kis ko DhūñDhtā huuñ maiñ

sahaara maujon ka le le ke baDh raha hun main

safina jis ka hai tufan wo naKHuda hun main

KHud apne jalwa-e-hasti ka mubtala hun main

na muddai hun kisi ka na muddaa hun main

kuchh aage aalam-e-hasti se gunjta hun main

ki dil se TuTe hue saz ki sada hun main

paDa hua hun jahan jis tarah paDa hun main

jo tere dar se na uThe wo naqsh-e-pa hun main

jahan-e-ishq mein go paikar-e-wafa hun main

teri nigah mein jab kuchh nahin to kya hun main

tajalliyat ki taswir khinch kar dil mein

tasawwuraat ki duniya basa raha hun main

junun-e-ishq ki nairangiyan are tauba

kabhi KHuda hun kabhi banda-e-KHuda hun main

badalti rahti hai duniya mere KHayalon ki

kabhi mila hun kabhi yar se juda hun main

hayat-o-maut ke jalwe hain meri hasti mein

taghayyuraat-e-do-alam ka aaina hun main

teri ata ke tasadduq tere karam ke nisar

ki ab to apni nazar mein bhi dusra hun main

baqa ki fikr na andesha-e-fana mujh ko

tayyunat ki had se guzar gaya hun main

mujhi ko dekh len ab tere dekhne wale

tu aaina hai mera tera aaina hun main

main miT gaya hun to phir kis ka nam hai 'bedam'

wo mil gae hain to phir kis ko DhunDhta hun main