yaad kar kar ke meri wafaen agar lakh aansu bahae to main kya karun

yaad kar kar ke merī vafā.eñ agar laakh aañsū bahā.e to maiñ kyā karūñ

jīte-jī haaye pūchhe na merī ḳharāb janāze pe aa.e to maiñ kyā karūñ

mujh ko ilzām nā-haq na de nāsehā maiñ sharābī nahīñ huuñ ḳhudā kī qasam

maiñ to piine se inkār karatā rahā apne hāthoñ pilā.e to maiñ kyā karūñ

maiñ use inqilāb-e-zamāna kahūñ yā use apnī qismat kā chakkar kahūñ

'umr bharnā par jis ke sajde ka.e vo hī ḳhud bhuul jaa.e to maiñ kyā karūñ

kyā kahūñ jazba-e-dil ko maiñ yā ḳhudā khīñch kar un kī mahfil meñ tū le gayā

kyā ḳhabar baiThe nigāhoñ se vo dil ko mere churā.e to maiñ kyā karūñ

koī hoshiyār hai koī sarshār hai apnī-apnī 'ibādat meñ 'faḳhrī' haiñ sab

shaiḳh takte rahe muñh to maiñ kyā karūñ riñd jannat meñ jaa.e to maiñ kyā karūñ

yaad kar kar ke meri wafaen agar lakh aansu bahae to main kya karun

jite-ji haye puchhe na meri KHarab janaze pe aae to main kya karun

mujh ko ilzam na-haq na de naseha main sharabi nahin hun KHuda ki qasam

main to pine se inkar karata raha apne hathon pilae to main kya karun

main use inqilab-e-zamana kahun ya use apni qismat ka chakkar kahun

'umr bharna par jis ke sajde kae wo hi KHud bhul jae to main kya karun

kya kahun jazba-e-dil ko main ya KHuda khinch kar un ki mahfil mein tu le gaya

kya KHabar baiThe nigahon se wo dil ko mere churae to main kya karun

koi hoshiyar hai koi sarshaar hai apni-apni 'ibaadat mein 'faKHri' hain sab

shaiKH takte rahe munh to main kya karun rind jannat mein jae to main kya karun