sau bar hui dil ki buri tarah tabahi

sau baar huī dil kī burī tarah tabāhī

ma.asūm hai phir bhī tirī duzdīda-nigāhī

tū ḳhāna-bar-andāz bane yā mirā dam-sāz

hai terī hukūmat tirā sikka tirī shāhī

tuune bhī agar pher lī chashm karam apnī

ham jaise gunāhgār kahāñ jaa.eñ ilāhī

ehsās kī duniyā meñ huuñ kyuuñ jī na bhar aa.e

dekhī nahīñ jaatī tire bandoñ kī tabāhī

taqdīr-e-mohabbat bhī kahāñ jā ke laḌī hai

maiñ banda-e-pur-aib vo mahbūb-e-ilāhī

yuuñ Dhal ga.ī marzī mirī manshā pe kisī ke

jo baat mere dil meñ Thanī us ne vo chāhī

Dartā huuñ maiñ jab zohd pe karatā hai koī naaz

lutiyā na Dubo de kahīñ nā-karda gunāhī

saaqī tirī yaad aate hī kho detī hai mujh ko

mastāna-ravish mast-adā mast-nigāhī

ye ishq kī manzil hai qadam phūñk ke rakhiye

'kāmil' hai yañh ek tabāhī sī tabāhī

sau bar hui dil ki buri tarah tabahi

masum hai phir bhi teri duzdida-nigahi

tu KHana-bar-andaz bane ya mera dam-saz

hai teri hukumat tera sikka teri shahi

tune bhi agar pher li chashm karam apni

hum jaise gunahgar kahan jaen ilahi

ehsas ki duniya mein hun kyun ji na bhar aae

dekhi nahin jati tere bandon ki tabahi

taqdir-e-mohabbat bhi kahan ja ke laDi hai

main banda-e-pur-aib wo mahbub-e-ilahi

yun Dhal gai marzi meri mansha pe kisi ke

jo baat mere dil mein Thani us ne wo chahi

Darta hun main jab zohd pe karata hai koi naz

lutiya na Dubo de kahin na-karda gunahi

saqi teri yaad aate hi kho deti hai mujh ko

mastana-rawish mast-ada mast-nigahi

ye ishq ki manzil hai qadam phunk ke rakhiye

'kaamil' hai yanh ek tabahi si tabahi