tul-e-rah-e-hayat se ghabra raha hun main

tūl-e-rah-e-hayāt se ghabrā rahā huuñ maiñ

ghabrā rahā huuñ aur chalā jā rahā huuñ maiñ

paiġhām rif.atoñ ke jo pahuñchā rahā huuñ maiñ

duniyā pe āsmāñ kī tarah chhā rahā huuñ maiñ

kuchh yuuñ bhī hai ki fitrat-e-ġham hai sukūñ pasand

kuchh ye bhī hai ki zabt ka.e jā rahā huuñ maiñ

qaid-e-junūñ meñ rishta-e-pā-e-kHayā ko

suljhā rahā huuñ aur phir uljhā rahā huuñ maiñ

aa aur dekh mahviyat-e-be-kHudī mirī

tujh se bhī be-niyāz huā jā rahā huuñ maiñ

chhūtī nahīñ mujhe par-e-jibrīl kī havā

ye kin bulandiyoñ pe uḌā jā rahā huuñ maiñ

ab vo mazāq-e-shāna-o-gesū nahīñ rahā

ab to ḳham-e-ḳhayāl ko suljhā rahā huuñ maiñ

terī sadā pe kaan zabāñ terī tarjumāñ

jo giit sun rahā huuñ vahī gā rahā huuñ maiñ

kyā ab bhī shak tujhe mirī paiġhambarī meñ hai

terā payām ruuh ko pahuñchā rahā huuñ maiñ

shākī huuñ husn se na mohabbat se sargirāñ

kaif-e-vafā ba-qadr-e-vafā pā rahā huuñ maiñ

markaz pe apne dhuup simaTtī hai jis tarah

yuuñ rafta rafta tere qarīb aa rahā huuñ maiñ

manzūr hai mujhe kashish-e-husn se shikast

le aaj tujh maiñ jazb huā jā rahā huuñ maiñ

tanqīd kar rahā huuñ mizāj-e-jamāl par

kāñToñ meñ bū-e-gul ko liye jā rahā huuñ maiñ

phir de rahā huuñ quvvat-e-vus.at ḳhayāl ko

simTī huī bisāt ko phailā rahā huuñ maiñ

tāj-o-kulāh-o-takHt pe merī nazar kahāñ

ab apne hī vajūd ko Thukrā rahā huuñ maiñ

hai husn ik jhalak mere ishq-e-tamām kī

apnī hī ik adā pe miTā jā rahā huuñ maiñ

uThtā huuñ mai-kade se aur aaj apne saath

jām-o-sharāb ko bhī liye jā rahā huuñ maiñ

kyuuñ mere tark-e-bāda pe tujh ko yaqīñ nahīñ

saaqī tire laboñ kī qasam khā rahā huuñ maiñ

tahlīl ho rahī hai mirī ruuh har nafas

ta.amīr-e-kā.enāt meñ kaam aa rahā huuñ maiñ

phir de rahā huuñ fitrat-e-insāñ ko dars-e-nāz

sar āstāñ-e-husn se uThvā rahā huuñ maiñ

dastam ba-ḳhair haath meñ hai zor-e-inqalāb

zarroñ ko āftāb se Takrā rahā huuñ maiñ

'sīmāb' kis ne arsh se āvāz dī mujhe

kah do ki intizār kare aa rahā huuñ maiñ

tul-e-rah-e-hayat se ghabra raha hun main

ghabra raha hun aur chala ja raha hun main

paigham rifaton ke jo pahuncha raha hun main

duniya pe aasman ki tarah chha raha hun main

kuchh yun bhi hai ki fitrat-e-gham hai sukun pasand

kuchh ye bhi hai ki zabt kae ja raha hun main

qaid-e-junun mein rishta-e-pa-e-kHaya ko

suljha raha hun aur phir uljha raha hun main

aa aur dekh mahwiyat-e-be-kHudi meri

tujh se bhi be-niyaz hua ja raha hun main

chhuti nahin mujhe par-e-jibril ki hawa

ye kin bulandiyon pe uDa ja raha hun main

ab wo mazaq-e-shana-o-gesu nahin raha

ab to KHam-e-KHayal ko suljha raha hun main

teri sada pe kan zaban teri tarjuman

jo git sun raha hun wahi ga raha hun main

kya ab bhi shak tujhe meri paighambari mein hai

tera payam ruh ko pahuncha raha hun main

shaki hun husn se na mohabbat se sargiran

kaif-e-wafa ba-qadr-e-wafa pa raha hun main

markaz pe apne dhup simaTti hai jis tarah

yun rafta rafta tere qarib aa raha hun main

manzur hai mujhe kashish-e-husn se shikast

le aaj tujh main jazb hua ja raha hun main

tanqid kar raha hun mizaj-e-jamal par

kanTon mein bu-e-gul ko liye ja raha hun main

phir de raha hun quwwat-e-wusat KHayal ko

simTi hui bisat ko phaila raha hun main

taj-o-kulah-o-takHt pe meri nazar kahan

ab apne hi wajud ko Thukra raha hun main

hai husn ek jhalak mere ishq-e-tamam ki

apni hi ek ada pe miTa ja raha hun main

uThta hun mai-kade se aur aaj apne sath

jam-o-sharab ko bhi liye ja raha hun main

kyun mere tark-e-baada pe tujh ko yaqin nahin

saqi tere labon ki qasam kha raha hun main

tahlil ho rahi hai meri ruh har nafas

tamir-e-kaenat mein kaam aa raha hun main

phir de raha hun fitrat-e-insan ko dars-e-naz

sar aastan-e-husn se uThwa raha hun main

dastam ba-KHair hath mein hai zor-e-inqalab

zarron ko aaftab se Takra raha hun main

'simab' kis ne arsh se aawaz di mujhe

kah do ki intizar kare aa raha hun main