duniya hai ye andaz-e-shabistan koi din aur

duniyā hai ye andāz-e-shabistāñ koī din aur

achchhā to phir ik ḳhvāb-e-pareshāñ koī din aur

hai fasl-e-shaguft-e-gul-o-bustāñ koī din aur

is rut meñ to rah jā.iye mehmāñ koī din aur

hotā na koī dard kā pursāñ koī din aur

rahtā ġham-e-pinhāñ ġham-e-pinhāñ koī din aur

gardish hī kī Thahrī to do-a.alam meñ phiruñgā

karatā huuñ tavāf-e-dar-e-jānāñ koī din aur

ik din tumheñ dekhā thā dhundalke meñ sahar ke

aisā kabhī aayā na daraḳhshāñ koī din aur

'sīmāb' pas-e-parda-e-ā.īna-e-hastī

chhup chhup ke vo kar leñ mujhe hairāñ koī din aur

duniya hai ye andaz-e-shabistan koi din aur

achchha to phir ek KHwab-e-pareshan koi din aur

hai fasl-e-shaguft-e-gul-o-bustan koi din aur

is rut mein to rah jaiye mehman koi din aur

hota na koi dard ka pursan koi din aur

rahta gham-e-pinhan gham-e-pinhan koi din aur

gardish hi ki Thahri to do-alam mein phirunga

karata hun tawaf-e-dar-e-jaanan koi din aur

ek din tumhein dekha tha dhundalke mein sahar ke

aisa kabhi aaya na daraKHshan koi din aur

'simab' pas-e-parda-e-aina-e-hasti

chhup chhup ke wo kar len mujhe hairan koi din aur