دنیا ہے یہ انداز شبستاں کوئی دن اور

دنیا ہے یہ انداز شبستاں کوئی دن اور

اچھا تو پھر اک خواب پریشاں کوئی دن اور

ہے فصل شگفت گل و بستاں کوئی دن اور

اس رت میں تو رہ جائیے مہماں کوئی دن اور

ہوتا نہ کوئی درد کا پرساں کوئی دن اور

رہتا غم پنہاں غم پنہاں کوئی دن اور

گردش ہی کی ٹھہری تو دو عالم میں پھروں گا

کرتا ہوں طواف در جاناں کوئی دن اور

اک دن تمہیں دیکھا تھا دھندلکے میں سحر کے

ایسا کبھی آیا نہ درخشاں کوئی دن اور

سیمابؔ پس پردہ آئینۂ ہستی

چھپ چھپ کے وہ کر لیں مجھے حیراں کوئی دن اور