najat-e-daimi hai husn walon ki nigahon mein

najāt-e-dā.imī hai husn vāloñ kī nigāhoñ meñ

jise aanā ho ā-jā.e mohabbat kī panāhoñ meñ

do-a.alam ko liye phirte haiñ jo apnī panāhoñ meñ

vo jalve kyā samā sakte haiñ insāñ kī nigāhoñ meñ

nazar vaalā nahīñ mujh sā tumhārī jalva-gāhoñ meñ

maiñ hairat ko butoñ kī pesh karatā huuñ gavāhoñ meñ

jhalak us rāz-e-sar-basta kī hai mere gunāhoñ meñ

chhupā rakhā thā jis ko sūfiyoñ ne ḳhānqāhoñ meñ

na hotā ehtirām-e-ishq agar un kī nigāhoñ meñ

to kyuuñ ye ehtimām-e-husn hotā kaj-kulāhoñ meñ

ham ai 'sīmāb' vo masnad-nashīn-e-mulak-e-ma.anī haiñ

hamārā zikr hotā hai adab se bādshāhoñ meñ

najat-e-daimi hai husn walon ki nigahon mein

jise aana ho aa-jae mohabbat ki panahon mein

do-alam ko liye phirte hain jo apni panahon mein

wo jalwe kya sama sakte hain insan ki nigahon mein

nazar wala nahin mujh sa tumhaari jalwa-gahon mein

main hairat ko buton ki pesh karata hun gawahon mein

jhalak us raaz-e-sar-basta ki hai mere gunahon mein

chhupa rakha tha jis ko sufiyon ne KHanqahon mein

na hota ehtiram-e-ishq agar un ki nigahon mein

to kyun ye ehtimam-e-husn hota kaj-kulahon mein

hum ai 'simab' wo masnad-nashin-e-mulak-e-mani hain

hamara zikr hota hai adab se baadshahon mein