bahr-jalwa na ruswa kar mazaq-e-chashm-e-hairan ko

bahr-jalva na rusvā kar mazāq-e-chashm-e-hairāñ ko

yahī bāteñ nigāhoñ se girā detī haiñ insāñ ko

junūñ se rabt-e-rūhānī hai dāmān-o-garebāñ ko

ki maiñ har taar meñ mahsūs karatā huuñ rag-e-jāñ ko

banā rakhā hai us ne sho.abada nafs-o-dil-o-jāñ ko

baḌā aarif hai vo jo toḌ de is dām-e-pinhāñ ko

kamāl-e-ḳhastagī se ruuh kī takmīl hotī hai

mohabbat meñ bigaḌnā bhī banā detā hai insāñ ko

jo haiñ nau-vāridān-e-sahn-e-gulshan un ko dāvat de

na chheḌ ai fasl-e-gul dīvāna-e-sar-dar-garebāñ ko

mubārak tujh ko apnī ḳhud-ravī lekin ye suntā jā

ki duniyā apne raste par lagā letī hai insāñ ko

na pahchāne koī us ko yahī pahchān hai us kī

to phir ab kyā kahūñ maiñ e'tibār-e-ahal-e-irfāñ ko

sukūñ kī justujū meñ kyuuñ hai ai 'sīmāb' sargardāñ

kahīñ āsūdgī miltī nahīñ un ke pareshāñ ko

bahr-jalwa na ruswa kar mazaq-e-chashm-e-hairan ko

yahi baaten nigahon se gira deti hain insan ko

junun se rabt-e-ruhani hai daman-o-gareban ko

ki main har tar mein mahsus karata hun rag-e-jaan ko

bana rakha hai us ne shoabada nafs-o-dil-o-jaan ko

baDa aarif hai wo jo toD de is dam-e-pinhan ko

kamal-e-KHastagi se ruh ki takmil hoti hai

mohabbat mein bigaDna bhi bana deta hai insan ko

jo hain nau-waridan-e-sahn-e-gulshan un ko dawat de

na chheD ai fasl-e-gul diwana-e-sar-dar-gareban ko

mubarak tujh ko apni KHud-rawi lekin ye sunta ja

ki duniya apne raste par laga leti hai insan ko

na pahchane koi us ko yahi pahchan hai us ki

to phir ab kya kahun main e'tibar-e-ahal-e-irfan ko

sukun ki justuju mein kyun hai ai 'simab' sargardan

kahin aasudgi milti nahin un ke pareshan ko