kyun na mayus mera zauq-e-farawan ho jae

kyuuñ na māyūs mirā zauq-e-farāvāñ ho jaa.e

aadmī kī hai ye me.arāj ki insāñ ho jaa.e

ālam-e-quds yahī ālam-e-imkāñ ho jaa.e

kaash insān ko insān kā irfāñ ho jaa.e

aish-e-duniyā kī taraf us kī nazar kyuuñ uTThe

ek aañsū hī jise daulat-e-dāmāñ ho jaa.e

sādgī husn kī mumkin hai pareshāñ na kare

ishq kī shaan yahī hai ki pareshāñ ho jaa.e

maiñ bulā.ūñ to ho tañg us pe bisāt-e-kaunain

aur ḳhud chāhe to mahfūz-e-rag-e-jāñ ho jaa.e

dil kā anjām baharhāl fanā hai 'sīmāb'

hai jo bujhne meñ takalluf to farozāñ ho jaa.e

kyun na mayus mera zauq-e-farawan ho jae

aadmi ki hai ye mearaj ki insan ho jae

aalam-e-quds yahi aalam-e-imkan ho jae

kash insan ko insan ka irfan ho jae

aish-e-duniya ki taraf us ki nazar kyun uTThe

ek aansu hi jise daulat-e-daman ho jae

sadgi husn ki mumkin hai pareshan na kare

ishq ki shan yahi hai ki pareshan ho jae

main bulaun to ho tang us pe bisat-e-kaunain

aur KHud chahe to mahfuz-e-rag-e-jaan ho jae

dil ka anjam baharhaal fana hai 'simab'

hai jo bujhne mein takalluf to farozan ho jae