کیوں نہ مایوس مرا ذوق فراواں ہو جائے

کیوں نہ مایوس مرا ذوق فراواں ہو جائے

آدمی کی ہے یہ معراج کہ انساں ہو جائے

عالم قدس یہی عالم امکاں ہو جائے

کاش انسان کو انسان کا عرفاں ہو جائے

عیش دنیا کی طرف اس کی نظر کیوں اٹھے

ایک آنسو ہی جسے دولت داماں ہو جائے

سادگی حسن کی ممکن ہے پریشاں نہ کرے

عشق کی شان یہی ہے کہ پریشاں ہو جائے

میں بلاؤں تو ہو تنگ اس پہ بساط کونین

اور خود چاہے تو محفوظ رگ جاں ہو جائے

دل کا انجام بہر حال فنا ہے سیمابؔ

ہے جو بجھنے میں تکلف تو فروزاں ہو جائے