ho na shikar-e-be-dili lazzat-e-gham uThae ja

ho na shikār-e-be-dilī lazzat-e-ġham uThā.e jā

dil na banā nahīñ sahī dard ko dil banā.e jā

vo bhī atā-e-dost hai ye bhī usī kī den hai

aish meñ qahqahe lagā taish meñ muskurā.e jā

dast-e-talab nahīñ rasā dast-e-karam to hai darāz

mil hī rahegā kuchh na kuchh haath yūñhī baḌhā.e jā

saare jahāñ ke falsafe hech haiñ us ke sāmne

ishq kā imtihāñ na le aql ko āzmā.e jā

aam jahāñ maiñ 'vārsī' ho na mazāq-e-āgahī

rāz-e-niyāz-e-āshiqī faash na kar chhupā.e jā

ho na shikar-e-be-dili lazzat-e-gham uThae ja

dil na bana nahin sahi dard ko dil banae ja

wo bhi ata-e-dost hai ye bhi usi ki den hai

aish mein qahqahe laga taish mein muskurae ja

dast-e-talab nahin rasa dast-e-karam to hai daraaz

mil hi rahega kuchh na kuchh hath yunhi baDhae ja

sare jahan ke falsafe hech hain us ke samne

ishq ka imtihan na le aql ko aazmae ja

aam jahan main 'warsi' ho na mazaq-e-agahi

raaz-e-niyaz-e-ashiqi fash na kar chhupae ja