jalwa koi nigah mein baatil nahin raha

jalva koī nigāh meñ bātil nahīñ rahā

ab imtiyāz-e-laila-o-mahmil nahīñ rahā

ye ġham nahīñ ki shaad mirā dil nahīñ rahā

mātam ye hai ki maiñ tire qābil nahīñ rahā

bedār us kā husn rahā chashm-e-ḳhvāb meñ

mujh se to niiñd meñ bhī vo ġhāfil nahīñ rahā

vīrāñ hai dil ki tere tasavvur se bu'ad hai

ye ā.īna bhī dar-ḳhur-e-mahfil nahīñ rahā

ġham huuñ rah-e-talab meñ ba-qadr-e-kamāl-e-zauq

mujh ko dimāġh-e-sāhil-o-manzil nahīñ rahā

aa.e haiñ chāra-sāz bhī nashtar-farosh bhī

jab maiñ davā-o-dard ke qābil nahīñ rahā

tūfāñ ne zindagī se mujhe sair kar diyā

achchhā rahā ki tishna-e-sāhil nahīñ rahā

mamnūn huuñ tirī nigah-e-dil-navāz kā

ai dost shukriya magar ab dil nahīñ rahā

manzūr un ko pursish-e-'sīmāb' hai magar

'sīmāb' 'arz-e-hāl ke qābil nahīñ rahā

jalwa koi nigah mein baatil nahin raha

ab imtiyaz-e-laila-o-mahmil nahin raha

ye gham nahin ki shad mera dil nahin raha

matam ye hai ki main tere qabil nahin raha

bedar us ka husn raha chashm-e-KHwab mein

mujh se to nind mein bhi wo ghafil nahin raha

viran hai dil ki tere tasawwur se bu'ad hai

ye aaina bhi dar-KHur-e-mahfil nahin raha

gham hun rah-e-talab mein ba-qadr-e-kamal-e-zauq

mujh ko dimagh-e-sahil-o-manzil nahin raha

aae hain chaara-saz bhi nashtar-farosh bhi

jab main dawa-o-dard ke qabil nahin raha

tufan ne zindagi se mujhe sair kar diya

achchha raha ki tishna-e-sahil nahin raha

mamnun hun teri nigah-e-dil-nawaz ka

ai dost shukriya magar ab dil nahin raha

manzur un ko pursish-e-'simab' hai magar

'simab' 'arz-e-haal ke qabil nahin raha