kahan jae nazar aur jae to jae kidhar ho kar

kahāñ jaa.e nazar aur jaa.e to jaa.e kidhar ho kar

vo ḳhud baiThe hue haiñ hā.il-e-hadd-e-nazar ho kar

hazāroñ soz-e-dar dil lauT aa.e tuur par ho kar

ye tum ne kyā lagā dī aag ik din jalva-gar ho kar

havādis ke bhañvar meñ baiTh jā sīna-sipar ho kar

yahī maujeñ kabhī sāhil baneñgī muḳhtasar ho kar

tamāshā.ī hai har zarre kā ḳhāk-e-rahguzar ho kar

ye terī past-bīnī is qadar bāliġh-nazar ho kar

hamesha mushkiloñ kī intihā hotī hai āsānī

shab-e-ġham sub.h ban jaatī hai bil-āḳhir basar ho kar

hañsī aatī hai mujh ko apne is saudā-e-nāqis par

ki tere dekhne kī aarzū hai ḳhud-nigar ho kar

vo āzādī se kar saktā nahīñ parvāz gulshan meñ

jo baiThā hai asīr-e-ehtiyāj-e-bāl-o-bar ho kar

ba-sad mushkil qarīb-e-āstān-e-dost pahuñchā huuñ

haram se duur ho kar but-kade se dūr-tar ho kar

tirā dil kyā ḳhudā.ī bhar ke dil ik roz dhaḌke.eñge

navā-e-’ishq gūñjegī navā-e-kārgar ho kar

na ho mahv-e-tamāshā ḳhalvat-e-mahdūd hastī meñ

guzar jā vus'at-e-kaunain kī had se nazar ho kar

isī par bul-havas ko zo'm hai tūfāñ uThāne kā

bahut royā to dāman rah gayā ashkoñ meñ tar ho kar

tasavvur kā ye adnā khel hai ai husn-e-āvāra

rahī barsoñ tirī tasvīr pāband-e-nazar ho kar

nazar ho chaar sau hairāñ ye tauhīn-e-tamāshā hai

maiñ ab kis kī taraf dekhūñ tarah jalva-nigar ho kar

ye hai turfa tasarruf be-qarār-e-dil ke mazāroñ kā

Thahar jaatā hai dam bhar jo nikaltā hai idhar ho kar

tumhīñ ko māñgtā huuñ tum se vo ziddī bhikārī huuñ

mire dast-e-du'ā meñ ḳhud hī aa jaao asar ho kar

jo dil TuuTe to har TukḌe se dil ke phir banā ik dil

hai kyuuñ rañj-e-shikast-e-ā.īna ā.īna-gar ho kar

koī tūfāñ nayā uThtā hai yā bijlī chamaktī hai

kisī din tuur par ham bhī dekheñ jalva-gar ho kar

nahīñ jis meñ tahammul mushkilāt-e-rāh-e-manzil kā

vo pachhtā.egā ai 'sīmāb' merā ham-safar ho kar

kahan jae nazar aur jae to jae kidhar ho kar

wo KHud baiThe hue hain hail-e-hadd-e-nazar ho kar

hazaron soz-e-dar dil lauT aae tur par ho kar

ye tum ne kya laga di aag ek din jalwa-gar ho kar

hawadis ke bhanwar mein baiTh ja sina-sipar ho kar

yahi maujen kabhi sahil banengi muKHtasar ho kar

tamashai hai har zarre ka KHak-e-rahguzar ho kar

ye teri past-bini is qadar baaligh-nazar ho kar

hamesha mushkilon ki intiha hoti hai aasani

shab-e-gham subh ban jati hai bil-aKHir basar ho kar

hansi aati hai mujh ko apne is sauda-e-naqis par

ki tere dekhne ki aarzu hai KHud-nigar ho kar

wo aazadi se kar sakta nahin parwaz gulshan mein

jo baiTha hai asir-e-ehtiyaj-e-baal-o-bar ho kar

ba-sad mushkil qarib-e-astan-e-dost pahuncha hun

haram se dur ho kar but-kade se dur-tar ho kar

tera dil kya KHudai bhar ke dil ek roz dhaDkeenge

nawa-e-’ishq gunjegi nawa-e-kargar ho kar

na ho mahw-e-tamasha KHalwat-e-mahdud hasti mein

guzar ja wus'at-e-kaunain ki had se nazar ho kar

isi par bul-hawas ko zo'm hai tufan uThane ka

bahut roya to daman rah gaya ashkon mein tar ho kar

tasawwur ka ye adna khel hai ai husn-e-awara

rahi barson teri taswir paband-e-nazar ho kar

nazar ho chaar sau hairan ye tauhin-e-tamasha hai

main ab kis ki taraf dekhun tarah jalwa-nigar ho kar

ye hai turfa tasarruf be-qarar-e-dil ke mazaron ka

Thahar jata hai dam bhar jo nikalta hai idhar ho kar

tumhin ko mangta hun tum se wo ziddi bhikari hun

mere dast-e-du'a mein KHud hi aa jao asar ho kar

jo dil TuTe to har TukDe se dil ke phir bana ek dil

hai kyun ranj-e-shikast-e-aina aaina-gar ho kar

koi tufan naya uThta hai ya bijli chamakti hai

kisi din tur par hum bhi dekhen jalwa-gar ho kar

nahin jis mein tahammul mushkilat-e-rah-e-manzil ka

wo pachhtaega ai 'simab' mera ham-safar ho kar