jannat jo mile la kar mai-KHane mein rakh dena

jannat jo mile lā kar mai-ḳhāne meñ rakh denā

kausar mire chhoTe se paimāne meñ rakh denā

mayyat na mirī jā ke vīrāne meñ rakh denā

paimānoñ meñ dafnā kar mai-ḳhāne meñ rakh denā

sajdoñ pe na de mujh ko arbāb-e-haram tā'ne

kā'be kā koī patthar but-ḳhāne meñ rakh denā

vo jis se samajh jaa.e rūdād mire ġham kī

aisā bhī koī TukḌā afsāne meñ rakh denā

ik jaam se mai-kash kā kyā hogā bhalā saaqī

mai-ḳhāne kā mai-ḳhāna paimāne meñ rakh denā

'sīmāb' ye fitrat kā adnā-sā ishāra hai

ḳhāmoshī se ik bijlī parvāne meñ rakh denā

jannat jo mile la kar mai-KHane mein rakh dena

kausar mere chhoTe se paimane mein rakh dena

mayyat na meri ja ke virane mein rakh dena

paimanon mein dafna kar mai-KHane mein rakh dena

sajdon pe na de mujh ko arbab-e-haram ta'ne

ka'be ka koi patthar but-KHane mein rakh dena

wo jis se samajh jae rudad mere gham ki

aisa bhi koi TukDa afsane mein rakh dena

ek jam se mai-kash ka kya hoga bhala saqi

mai-KHane ka mai-KHana paimane mein rakh dena

'simab' ye fitrat ka adna-sa ishaara hai

KHamoshi se ek bijli parwane mein rakh dena