suraten sust hain mani ki taraf jaane mein

sūrateñ sust haiñ ma.anī kī taraf jaane meñ

ab azaañ do ki ham aate haiñ sanam-ḳhāne meñ

shād-o-nā-shād guzārī usī ġham-ḳhāne meñ

koī to raaz thā mar mar ke jiye jaane meñ

ham-nashīñ kyā maiñ tujhe da'vat-e-mai-naushī duuñ

ashk hī ashk bhare haiñ mere paimāne meñ

manzil-e-ishq hai jāda-o-be-naqsh-e-qadam

ab na hushiyār meñ jur.at hai na dīvāne meñ

lagtī rahtī hai havā-e-nafs-e-garm se aag

hote rahte haiñ izāfe mere vīrāne meñ

qūvat-o-bul'ajbī zehn-e-parastish kī na pūchh

ya.anī ik but hai ḳhudā bhī mere but-ḳhāne meñ

jaag uThī kaifiyat-e-soz-e-mohabbat 'sīmāb'

sub.h se jaan paḌī shaam ke parvāne meñ

suraten sust hain mani ki taraf jaane mein

ab azan do ki hum aate hain sanam-KHane mein

shad-o-na-shad guzari usi gham-KHane mein

koi to raaz tha mar mar ke jiye jaane mein

ham-nashin kya main tujhe da'wat-e-mai-naushi dun

ashk hi ashk bhare hain mere paimane mein

manzil-e-ishq hai jada-o-be-naqsh-e-qadam

ab na hushiyar mein jurat hai na diwane mein

lagti rahti hai hawa-e-nafs-e-garm se aag

hote rahte hain izafe mere virane mein

quwat-o-bul'ajbi zehn-e-parastish ki na puchh

yani ek but hai KHuda bhi mere but-KHane mein

jag uThi kaifiyat-e-soz-e-mohabbat 'simab'

subh se jaan paDi sham ke parwane mein