صورتیں سست ہیں معنی کی طرف جانے میں

صورتیں سست ہیں معنی کی طرف جانے میں

اب اذاں دو کہ ہم آتے ہیں صنم خانے میں

شاد و نا شاد گزاری اسی غم خانے میں

کوئی تو راز تھا مر مر کے جیے جانے میں

ہم نشیں کیا میں تجھے دعوت مے نوشی دوں

اشک ہی اشک بھرے ہیں مرے پیمانے میں

منزل عشق ہے جادہ و بے نقش قدم

اب نہ ہشیار میں جرأت ہے نہ دیوانے میں

لگتی رہتی ہے ہوائے نفس گرم سے آگ

ہوتے رہتے ہیں اضافے مرے ویرانے میں

قوت و بوالعجبی ذہن پرستش کی نہ پوچھ

یعنی اک بت ہے خدا بھی مرے بت خانے میں

جاگ اٹھی کیفیت سوز محبت سیمابؔ

صبح سے جان پڑی شام کے پروانے میں