rasa us anjuman mein bhi nazar malum hoti hai

rasā us anjuman meñ bhī nazar ma.alūm hotī hai

jahāñ mauj-e-havā be-bāl-o-par ma.alūm hotī hai

mizāj āgāh-fitrat chashm tar ma.alūm hotī hai

naved-e-ġham naved-e-muntazir ma.alūm hotī hai

pas-e-har rah-guzar ik rah-guzar ma.alūm hotī hai

ye duniyā tā-ba-duniyā-e-digar ma.alūm hotī hai

sadā-e-sāda bhī vahshat-asar ma.alūm hotī hai

havā-e-gul baḌī dīvāna-gar ma.alūm hotī hai

maqām ik intihā-e-ishq meñ aisā bhī aatā hai

zamāne kī nazar apnī nazar ma.alūm hotī hai

koī ulfat kā dīvāna koī matlab kā dīvāna

ye duniyā sirf dīvānoñ kā ghar ma.alūm hotī hai

sunā kar lantarānī chhup ga.ī 'sīmāb' jo bijlī

dil-e-shā.ir meñ ab tak naġhma-gar ma.alūm hotī hai

rasa us anjuman mein bhi nazar malum hoti hai

jahan mauj-e-hawa be-baal-o-par malum hoti hai

mizaj aagah-fitrat chashm tar malum hoti hai

nawed-e-gham nawed-e-muntazir malum hoti hai

pas-e-har rah-guzar ek rah-guzar malum hoti hai

ye duniya ta-ba-duniya-e-digar malum hoti hai

sada-e-sada bhi wahshat-asar malum hoti hai

hawa-e-gul baDi diwana-gar malum hoti hai

maqam ek intiha-e-ishq mein aisa bhi aata hai

zamane ki nazar apni nazar malum hoti hai

koi ulfat ka diwana koi matlab ka diwana

ye duniya sirf diwanon ka ghar malum hoti hai

suna kar lantarani chhup gai 'simab' jo bijli

dil-e-shair mein ab tak naghma-gar malum hoti hai