dil ko nahin sukun meri jaan tere baghair

dil ko nahīñ sukūn mirī jaañ tire baġhair

aa jā ki zindagī hai pareshāñ tire baġhair

sāġhar ḳhāmosh jaam tahī mai-kada udaas

suunī paḌī hai mahfil-e-rindāñ tire baġhair

dil chaak siina chaak jigar chaak al-firāq

ham ho ga.e haiñ chāk-e-girebāñ tire baġhair

kis se kaheñ jo tū na sune dāstān-e-ġham

ham be-kasoñ kā kaun hai pursāñ tire baġhair

phir dil meñ jal sakī na koī sham’-e-ārzū

us ghar meñ ho sakā na charāġhāñ tire baġhair

jis samt dekhtā huuñ samāñ hai dhuāñ-dhuāñ

har manzar-e-hayāt hai vīrāñ tire baġhair

aa jā ki bujh chale haiñ tamannāoñ ke diye

siine meñ dafn ho ga.e armāñ tere baġhair

tum kyā ga.e ki luT gayā sāmān-e-zindagī

ham ho ga.e haiñ be-sar-o-sāmāñ tire baġhair

jaise firāqe-e-gul meñ ro.e koī 'andalīb

yuuñ 'sājid'-e-hazīñ hai ġhazal-ḳhvāñ tire baġhair

dil ko nahin sukun meri jaan tere baghair

aa ja ki zindagi hai pareshan tere baghair

saghar KHamosh jam tahi mai-kada udas

suni paDi hai mahfil-e-rindan tere baghair

dil chaak sina chaak jigar chaak al-firaq

hum ho gae hain chaak-e-gireban tere baghair

kis se kahen jo tu na sune dastan-e-gham

hum be-kason ka kaun hai pursan tere baghair

phir dil mein jal saki na koi sham’-e-arzu

us ghar mein ho saka na charaghan tere baghair

jis samt dekhta hun saman hai dhuan-dhuan

har manzar-e-hayat hai viran tere baghair

aa ja ki bujh chale hain tamannaon ke diye

sine mein dafn ho gae arman tere baghair

tum kya gae ki luT gaya saman-e-zindagi

hum ho gae hain be-sar-o-saman tere baghair

jaise firaqe-e-gul mein roe koi 'andalib

yun 'sajid'-e-hazin hai ghazal-KHwan tere baghair