دل کو نہیں سکون مری جاں ترے بغیر

دل کو نہیں سکون مری جاں ترے بغیر

آ جا کہ زندگی ہے پریشاں ترے بغیر

ساغر خاموش جام تہی مے کدہ اداس

سونی پڑی ہے محفل رنداں ترے بغیر

دل چاک‌ سینہ چاک‌ جگر چاک‌ الفراق

ہم ہو گئے ہیں چاک‌ گریباں ترے بغیر

کس سے کہیں جو تو نہ سنے داستان غم

ہم بے کسوں کا کون ہے پرساں ترے بغیر

پھر دل میں جل سکی نہ کوئی شمع آرزو

اس گھر میں ہو سکا نہ چراغاں ترے بغیر

جس سمت دیکھتا ہوں سماں ہے دھواں دھواں

ہر منظر حیات ہے ویراں ترے بغیر

آ جا کہ بجھ چلے ہیں تمناؤں کے دئے

سینے میں دفن ہو گئے ارماں تیرے بغیر

تم کیا گئے کہ لٹ گیا سامان زندگی

ہم ہو گئے ہیں بے سر و ساماں ترے بغیر

جیسے فراق گل میں روئے کوئی عندلیب

یوں ساجدؔ حزیں ہے غزل خواں ترے بغیر