par mere kaT ke sayyaad ne irshad kiya

par mere kaaT ke sayyād ne irshād kiyā

le qafas khol diyā jā tujhe āzād kiyā

maiñ terī aisī navāzish ke tasadduq pyāre

tū ne apnā samajh ke mujhe barbād kiyā

apnī zulfoñ kā banā kar mujhe qaidī us ne

phir ye irshād kiyā jā tujhe āzād kiyā

terī āñkhoñ ne 'atā kī hai vo mastī saaqī

ham jahāñ baiTh ga.e mai-kada ābād kiyā

sūrat-e-pīr-e-muġhāñ aa.ī nazar sāġhar meñ

mai jo piite hue rindoñ ne ḳhudā yaad kiyā

ham ko zāhid na samajh yād-e-ḳhudā se ġhāfil

jab koī dekhā hasīñ ham ne ḳhudā yaad kiyā

maiñ dam dūñgā na tujhe us ko na jab tak dekhūñ

ai ajal Thahar ki aaj us ne mujhe yaad kiyā

kaun kahtā hai ki tum ne mujhe barbād kiyā

bā-ḳhudā shaad kiyā shaad kiyā shaad kiyā

bahr-e-taskīñ chalī aa.ī ġharīb-ul-vatanī

ham ne 'sājid' jo kabhī apnā vatan yaad kiyā

par mere kaT ke sayyaad ne irshad kiya

le qafas khol diya ja tujhe aazad kiya

main teri aisi nawazish ke tasadduq pyare

tu ne apna samajh ke mujhe barbaad kiya

apni zulfon ka bana kar mujhe qaidi us ne

phir ye irshad kiya ja tujhe aazad kiya

teri aankhon ne 'ata ki hai wo masti saqi

hum jahan baiTh gae mai-kada aabaad kiya

surat-e-pir-e-mughan aai nazar saghar mein

mai jo pite hue rindon ne KHuda yaad kiya

hum ko zahid na samajh yaad-e-KHuda se ghafil

jab koi dekha hasin hum ne KHuda yaad kiya

main dam dunga na tujhe us ko na jab tak dekhun

ai ajal Thahar ki aaj us ne mujhe yaad kiya

kaun kahta hai ki tum ne mujhe barbaad kiya

ba-KHuda shad kiya shad kiya shad kiya

bahr-e-taskin chali aai gharib-ul-watani

hum ne 'sajid' jo kabhi apna watan yaad kiya